Wir Albrecht von Gottes gnaden Herczog ze O^esterreich zc. Bechennen vnd tu^on chunt Vmb den Turn genant der Gugelperg gelegen ze Gmvnden, der vnsers getrewn Mathes des Schu^eler, daselbs ze Gmvnden, sacz von vns, vnd vnserm lieben bruder Herczog Leuppold gewesen ist, für CC Pf. wienner Phenninge, daz denselben Satz vnser getrewr Chu^onrad der Steger mit vnserm gu^otem willen vnd mit vnserer gunst, vmb die egenanten CC Pf. phenning, an sich geledigt vnd gelo^eset hat, Also daz er sein Hausfrow vnd ir erben denselben Turn vnd die funf vnd zwainczig phunt phenning, die ierlich zu purchhu^ot dahin geuallent, innehaben vnd niessen sullen in phandes weis, an abslag der nucze als lang, vntz daz wir, vnser lieber bru^oder Herczog Leuppold, oder vnser erben, si der egenanten CC Pf. gancz vnd gar bericht vnd beczallt haben, Vnd all die weil wi^er sie desselben gelts nicht bericht haben, Sullen vnd wellen wir si da nicht enthausen an geuerde. Si sullen vns auch der losung stat tu^on vnd gehorsam sein, swenn wir si mit dem egenanten irm gelte ermanen vnd di an si vordem vngeuärlich. Auch sullen si, oder swer den vorgenanten Turn von irn wegen innehat, vns damit wartend vnd gehorsam sein, vns vnd die vnsern darin vnd darauz ze lazzen, vnd auch darinn ze enthaltenn, swenn vnd wie offt vns des not geschikt (!) an irn merklichen schaden. Mit vrchund dicz briefs. datum wienne feria sexta ante Georij Anno zc. LXXVIJ.

Source Fulltext: OÖUB 9 (Wien 1906), S. 231-232