ICH Vlreich der Scharffenberger vnd mitsampt mier alle mein erben, wie die genant sind, wir vergehen vnd tu^en chunt mit dem offen prief vor allen lewten gegenwu^ertigen vnd chunftigen, Daz wir mit wolbedachtem mu^et, mit gunst vnd willen vnser erben recht vnd redleich ze chauffen geben haben vnser Gu^et an dem Datelpawngarten genant in Aschacher pharre gelegen, daz freyes aigen ist, dem Gotshaws vnser frawn ze Ernsthofen vnd haben im auch dasselbig gu^et demselben Gotshaws gegeben aws vnser nutze vnd gewer in sein nutze vnd gewer mit allen den rechten versu^echt vnd vnuersu^echt, wie daz alles genant ist, Vnd tu^en vns auch desselben gu^ets aller sache ga^entzleich vnd gar mit dem prief ze fu^erzicht. Wir sullen vnd wellen auch desselben gu^ets dez vorgenanten Gotshaws gewer sein nach dem lantsrecht, als freyes aigens recht ist in dem lant ze Ostereich. Naemen si darvber die pharrlewtt, die dasselbig Gotshaws inne habent, von der gewerschaft desselben Gotshaws indert dhainen schaden, wie derselbig schad genant wurde, den si pei iren trewen an aide gesprechen mugen, denselben schaden sullen wir in gantz vnd gar ablegen vnd widercheren an alle widerrede vnd sullen auch daz haben datz vns vnd vnsern trewn vnd darzu datz unser hab vnd desselben schadens davon becho^emen an chlag, furbot vnd recht, so si nachst mugen, mit vns vnd vnser erben gu^etleichem willen, wir sein lembtig oder tod. Vnd dez ze vrchunde gib jch V/olreich der Scharffenberger dem Gotshaws ze Ernsthofen den prief fu^er mich vnd mein erben versigilten mit meinem anhangunden jnsigil vnd zu^e ainer gu^eten getzewgnu^esse mit hern Stephans dez Schekchen vnd mit Hainreichs dez Schekchen anhangunden jnsigiln in an schaden. Geben nach Christi gepurde Drewtzehen Hundert iar, darnach in dem siben vnd Sibentzgisten iar an sand jo^erigen tag.

Source Fulltext: OÖUB 9 (Wien 1906), S. 243-244