Wir Leupolt von Gotes gnaden Herczog ze O^esterich, ze Steyr, ze Kernden vnd ze Krain, Graf ze Tyrol zc. Tu^on kunt vmb Burkstal, vnd vmb das Gericht ze Metten, die vnsers getrewn lieben Fridreichs von Greiffenstain Sa^etze von vnsern vordem vnd von vns sind, daz wir vnsern willen vnd gunst, darczu^e gegeben haben, daz er die erbern Kathrein, sein Swester, Rudolfs des Lazperiger eleich wirtinn, darauf für ir Heyratgu^ot geweiset hat, vmb als vil gelts, als Jm die gestanden sind, vnd als die Satzbrief vnd Heyratbrief sagent, die der egenanten Kathrein dar vber gegeben sind, Doch also daz es dem Hochgeborn fursten vnserm lieben bru^oder Herczog Albrechten, vns vnd vnsern erben an der Losung kain schad sey. Mit vrkund dicz brief. Geben ze Pöczen an Phincztag nach dem Prehemtag . Nach kristes Gepurde dreuczehen hundert Jar, darnach in dem Siben vnd Sibenczigistem Jare.

Source Fulltext: OÖUB 9 (Wien 1906), S. 185-186