Ich Haertneid der Elter Chu^ochlaer, Obrister Marschalk des Gotshaus ze Salczburg, Jch Haertneid vnd ich Eberhart sein Suen, wir verjehen fu^er vns, fu^er vnser Hausfrawn vnd fu^er all vnser eriben, es sein Su^en oder toechter vnd fu^er all vnser nach Chomen, — vnd tu^en chu^ent — das wir — — ze Chauffen haben geben dem Beschaiden mann Pauln dem Cholraer, Buriger ze Salczburg seiner Hausfrawn vnd allen iren eriben vnd nach Chomen, es sein su^en oder toechter, vnsern Hof, genant ze Lynd, den wir gehabt haben vnd der gelegen ist ze Salzburg vor der Stat pei der Glon, vnd haben wir in den Egnanten Hof ze Lynd gegeben vnd in geantwu^ert aus vnser nu^eczz vnd gewer,— — —, als wirs vnd vnser vodern inne gehabt vnd herpracht haben an als gevaerd, Seu habent vns auch den voruerschriben Hof, mit aller zu^o geho^erung vergolten gants vnd gar, — Also mit der beschaidenhait das wir vnser aller Hausfrawn, vnd Eriben vnd all vnser nach Chomen, noch niemant von vnsern wegen, auf den vorbenanten Hof vnd was dar zue geho^ert, hin fu^er Ewichleich vnd ymmer nichts mer ze Reden noch ze sprechen schullen haben mit Recht noch an recht — — vnd haben in auch den obgnanten Hof aufgeben vnd Richtig gemacht mit vnsers Genaedigen Herren haut von Salczpurch, von dem, vnd seinem Gotshaus, er ze lehen ist, vnd der in, den verlyhen hat mit vnserm guetleichen willen. Wir schullen auch des voruerschriben Hofs ir Gewer vnd fu^erstant sein — —, also lehens vnd des Landes recht ist angeuaerd. Gyeng seu hinfu^er dar vber yndert Chrieg oder Stoezz dar vmb an, — das schullen wir in alles ausrichten an allen iren schaden. — Vnd das der voruerschriben Chauf, gelueb vnd taiding also Staet vnd vnczerprochen beleyb, dar vber ze ainem vrchuent der warhait der voruerschriben sache, geben wir in den brief versigelten, mit vnser vorgenanter Hertneids des eitern Chu^ochler vnd Hertneids seins Su^ens aigem anhangunden Jnsigeln, dar vnder Jch mich Eberhart sein Su^en, vnser aller Hausfrawn vnd all vnser erben vnd nach chomen mit vnsern trewn verpu^enten haben alles das staet ze halten vnd genczleich ze volfu^eren, das an dem brief geschriben stet, wann ich, egnanter Eberhart der Chu^echler nicht aigens insigels het di zeit, Der brief ist Geben ze Salczburg an vnser Frawn tag irer Schydung da man zalt von christi gepurd Drew zehen Hundert Jar vnd darnach in dem syben vnd Sibenczigistem Jar.

Source Fulltext: OÖUB 9 (Wien 1906), S. 294-295