Wir Graf Hainreich von Schawnberg vnd alle vnser Erben vnd nachkommen, Bechennen offenleich mit dem brief allen den, die in sehent oder horent lesen, Daz wir mit gu^otem willen vnd gunst aller vnserr Erben vnd mit wolbedachtem mu^ot, ein ewigez seigera^et vns vnd vnsern voruodern vnd nachkommen , haben gemacht in dem frawnchloster Grabs Ordens, dacz dem heiligen Geist zu Ybs vnd haben den Erbern Geistleichen Frawn daselben gegeben, durch got die aygenschaft aller der Gu^eter, die Reynhart der Tu^ors in gemacht hat, waz der ist in dem dorff zu hakchstorf, die auf drew pfunt geltz geschaczt sind, die er von vns zu lehen gehabt hat, vnd zway ligent bey Tu^onawdorff, die in der Erber Ritter Nicla von Ro^erenpach hat geschaft vnd von vns zu lehen gehabt hat, die aignen wir dem vorgenanten Gotzhaus ze Ybs ewichleich ze haben in Rechten aigens gewer. vnd die Geistleichen frawn daselben habent vns verhaizzen mit iren briefen ainen Jartag ze begeen Ja^erleichen vnd ewichleichen vns vnd vnsern voruodern vnd nachkomen dez nachsten tagez nach sand Jacobs tag in dem Snit, dez abentz mit einer Vigilij vnd dez morgens mit Selmessen nach irs Ordens gewonhait, vnd dezselben tagez sol die Abtessin geben der gemain ze pezzerung irr phrünt yegleicher frawen ein halbs Cha^endel weins, zway Stukch visch vnd weizzbrot. Wa^er aber, daz si dez vorgenanten tagez von ehafter not den Jartag nicht begen mochten, alz vorgeschriben ist, so sullen si darnach dez nachsten tagez die Saumung volfu^eren. Beschach dez nicht, wie wir dez indert inn wurden, so habent sich die vorgenanten A^ekcher vnd gu^eter veruallen vnserm Gotzhaus zu Wilhering, vnd wer denn zu den zeiten Abpt da ist, der sol sich der vorbenanten A^ekcher vnd gu^eter, vnderczichen mit irem gu^etleichen willen vnd gunst vnd an allen chrieg. Wir haben auch dem vorgenanten frawn Chloster ze Ybs gegeben freyung vnd füruart an vnserr Mauttstat zu Aschach zu zwayn Pfunten weitz pantz vnd zu acht pfunten chlains pantz Salcz, daz si vnd wer ez in irm nam fu^ert, Ja^erleichen vnd ewichleichen ains Jmm Jar sullen fu^eren an all Mautt, zol vnd pfranchsal, vnd an all irrung aller vnserr Mautter, die nu sind vnd hernach chünftich werdent, vnd darumb habent si vns verhaizzen vnd gelobt, einen andern Jartag Ja^erleichen vnd ewichleichen ze begen dez nachsten montages vor der Quattemer imm Aduentt, auch mit einer vigilij vnd mit selmessen, vnd dezselben tagez sol die sampnung der frawn tro^est werden mit den Pitanczen, die an dem vorgeschriben Jartag benant sind, vnd daz in die red ewichleichen sta^et, gancz vnd vnzebrochen beleib, Daru^eber geben wir vorgenant Graf Hainreich zu Schawnberch, dem egenanten Gotzhaus zw Ybs, den brief versigelten mit vnserm grozzen¹⁾ anhangunden Jnsigl, Der geben ist nach Kristi gepürd dreuczehen Hundert Jar vnd in dem siben vnd sibenczigisten Jar an sand Jacobs abent in dem Snit.

Source Fulltext: OÖUB 9 (Wien 1906), Nr. 227