Wir Albrecht vnd Leupolt Gebrüder von gots gnaden Herczogen ze Österreich, ze Steyr, ze Kernden vnd ze Krain, Grafen ze Tyrol zc. Tu^on chunt, Daz wir den erbern vnsern gesunder (!) lieben, dem Capitel des Tu^oms ze Pazzow die gnad getan haben, vnd tu^on ouch wizzentlich, Swas si wein vnd Getreid hin auf gen Pazzow auf dem Wazzer fu^erent, daz man in das nicht verpieten noch niderlegen sol, für die geltschuld, die ir ainer oder zwen schuldig weren, es gieng danne dieselb geltschuld das gancz Capitel ane, Darumb gepieten wir allen Houbtleuten, Herren, Rittern vnd knechten, Purggrafen, Richtern, Mauttner, vnd allen andern, den diser brief geczaigt wirdt, vnd wellen, daz si daz vorgenant Capitel bey diser vnser gnad beleiben lazzen, vnd in ir wein noch getraid für die geltschuld, die ir ainer auz dem Capitel oder zwen schuldig weren, nicht auf haben noch nider legen in dhain weg. Mit vrchund dicz briefs, Geben ze Wienn an Suntag nach sand Erasm tag, Nach krists gepurd dreu czehen Hundert iar dar¬nach in dem siben vnd Sibenczigistem iare.

Source Fulltext: OÖUB 9 (Wien 1906), S. 264