Wir Albrecht von gotes gnaden Herczog ze Österreich zc. vergehen vnd tu^on ku^ont offenleich mit disem brief für vns vnsern lieben Bru^oder Herczog Leupolten vnd für vnser erben, allen den die in ansehent Lesent oder hörent lesen, daz vnser lieber getrewer Gotfrid der Rorer von Lenstain den Satz zu Wolspach vnd drew pfunt gelts vnd die Gult auf vnserm Hof ze Reicholsperg vnd die gült auf vnsern zwain Höfen ze Ogelspach vnd ze Potnaw dacz Paltreym drithalb pfunt phenning gelts vnd vier vnd zwainczig mutt voythabern dacz Chötweig vnd vnser werde die gelegen sind ze Tulln vnd sind genant der Huttler werd, der Gayselwerd, der Rorpausch, der Goldhauf vnd der Sulczwerde mit vnser gunst vnd gutem willen geledigt vnd gelöst hat von Wilhalm von Elrbach sellich vnd seinen Brüdern vmb fümfhundert vnd zwelif pfunt wienner phenning die dieselben von Elrbach darauf gehabt habent vnd darumb Sy dieselben pfant gelöst hetten von Eberharten von Dachsperg vnd von sein vettern den Sy von vnserm lieben Bru^oder Herczog Ru^odolff seligen versatzt warn, Dauon sol der vorgenant Rora^er vnd sein erben die egenanten Gu^oter gült vnd werde furbazzer von vns in pfands weis innhaben vnd niessen ane abslag der nücze als lang vncz daz wir vnser Brüder Herczog Leupolt vnd vnser erben, Sy der vorgenanten fümfhundert pfunt vnd zwelf pfunt wienner pfenning ga^enczleich verrichten vnd gewern. Mit Vrkunt dicz briefs, Geben zu Wienn an Eritag vor sand Johanstag ze Sunwenden Anno domini Millesimo Trecentesimo Sepagesimo Septimo. Wolfgangus de Winden. Magister Curie de Ried.

Source Fulltext: OÖUB 9 (Wien 1906), S. 267