JCH Hanns von Stadekk vnd alle mein Erben Vergehen vnd tun chunt allen den, die den brief lesent oder hörent lesen. Umb die drew Tawsent phunt wienner phenning haubtgu^ets, die wir gelten süllen Dauiden dem Stewzzen dem Juden ze Wienne Hennlein Sun von Newnburch vnd seinen Erben vnd den dienst, den wir Jn ierleich dauon dienen su^ellen, dafu^er wir Jn zephannt gesatzt haben vnser Vestt ze Liechtenstain vnd swas dartzu^o geho^eret, vnd dartzu^e dennoch der erber herr vnser lieber O^ehem her Hainreich von Waltse die zeit Houbtman ob der Enns mit sambt seinen Erben vnuerschaidenleich selbgeschol vnd gewer mit Vns worden ist, Daz wir Jm vnd seinen Erben darvmb gelobt vnd verhaizzen haben vnd verpinden vns gegen Jn mit dem Brief, daz wir Si von derselben geltschuld vmb houbtgu^et vnd vmb dienst gentzleich ledigen wellen Vnd su^ellen an allen irn schaden zu den tegen, so wir desselben gelts die vorgenanten Juden richten su^ellen, als der brief sagt, den si von vns darvmb habent. Tet wir des nicht, allen den schaden, den des denne der egenant vnser O^ehem von Waltse oder sein Erben nement, in welhen wegen das ist vnd wie der schad genant ist, das ir ains sprichet seinen worten an aid vnd an alle bewerung darvmb ze gelauben, denselben schaden mit sambt dem houbtgu^et su^ellen wir Jn gentzleich ablegen vnd widerchern, wenne Si des nicht lennger enpern wellent. Tet wir des auch nicht, wenne Si vns denne monent vnd vodernt, so su^ellen wir vier Erber chnecht igleichen selbandern mit zwain pherten des nechsten tags darnach ze Wienne in ein erber gasthaus sennden, wo Si vns hinzaigent, vnd su^ellen die da innligen vnd laisten, als innligens vnd laistens recht ist, vnd da nymmer auschomen, vntz das wir den vorgenanten vnsern O^ehem hern Hainreichen von Waltse vnd alle sein Erben von der obgenanten geltschuld vmb houbtgu^et vnd dienst vnd vmb schaden gentzleich geledigen vnd gelo^efen vnd daz wir Jn auch alle die scheden ablegen, die Si des nement, als vorgeschriben stet, Das luben wir Jn alles ze laisten mit vnsern trewn an geuer. Wer aber, daz wir Jn die Laistung vertzugen vnd also nicht laistteten oder daz wir Jn solanng laistteten, das Si des verdruzz, so su^ellen Si denne vollen gewalt vnd recht haben, daz Si an der egenanten Juden stat die vorgenanten Vestt ze Liechtenstain vnd alles das, das dartzu^e geho^eret nichts ausgenomen, mit allen den nu^etzen, Ern vnd rechten, als wir die den vorgenanten Juden versatzt haben, verchouffen oder versetzen su^ellen, wem Si wellent, vnd allen irn frvmen damit schaffen mu^egen, wie Jn das allerpest chumt vnd fuegleich ist, vnd su^ellen wir Si mit chainen sachen daran hindern noch irren vnd sol auch Si vnser herr der Herczog in O^esterreich, oder wer seinen gewalt hat, darouf schirmen an fu^erbot, an chlag vnd an alles recht Alsuerr, daz Si sich selber von der obgenanten geltschuld vmb houbtgu^et, vm dienst vnd vmb schaden gentzleich geledigen vnd gelo^esen vnd daz Jn auch alle die schaeden abgelegt werden, die Si des nement, als vorgeschriben stet. Wer aber, daz Jn houbtgu^ets oder schadens an der egenanten Vestt vnd an aller irer zugeho^erung icht abgieng, das su^ellen Si haben datz mir egenanten Hannsen von Stadekk vnd datz allen meinen Erben vnd auf allem vnserm gu^et, das wir haben in den Lannden ze O^esterreich vnd ze Steyr, oder wo wir es haben, Dauon Jn der Lanndes fu^erst oder sein Lanntmarschalich oder Houbtman, oder wer irn gewalt hat, auch an fu^erbot, an chlag vnd an alles recht Phannt antwu^ertten su^ellen, wo der egenant vnser O^ehem von Waltse oder sein Erben darouf zaigent, Alsuerr, daz Si houbtgu^ets, diensts vnd schadens, swas Jn des an der egenanten Vestt vnd irer zugehörung abget, gantz vnd gar verricht vnd gewert werden vnd daz Jn auch alle ir scheden abgelegt werden, als vorgeschriben stet, wir sein lebentig oder tod. Vnd daru^eber so gib ich obgenanter Hanns von Stadekk fu^er mich vnd fu^er alle mein Erben dem obgenanten meinem O^ehem hern Hainreichen von Waltse vnd allen seinen Erben den brief zu einem warn offen vrchu^end der Sach versigelten mit meinem insigil vnd mit meins O^ehems insigil hern Wolfgangs von Wynnden, der das durich meiner vleizzigen pet willen zu einer getzeugnu^ezz der Sach an den brief gehangen hat Jm an schaden. Der brief ist geben nach Christes gepu^ort Drewtzehenhundert iar, darnach in dem Siben vnd Sibentzgistem Jar an Sand Peters vnd Sand Pawls Tag der heiligen zwelifboten.

Source Fulltext: OÖUB 9 (Wien 1906), S. 271-273