Wir Albrecht vnd Leopolt, Gebru^eder, von gotz genaden Herczogen ze o^esterreich zc. enbieten vnsern getrewn li^eben vnserm Haubtmann zu der freynstat, wer der i^eczunt ist, oder i^e fu^erbazer wu^erde, vnser genad vnd alles gu^ot, Wann vnz vnser Pu^orger von der freynstat fu^erpracht habent, daz daz saltz von Lintzz gen Lanvelden gefu^ert vnd getragen werd, mer dann pilleich vnd recht sei, vnd auch an der vngewo^enleich strazzen gen Pehaym wert gefu^eret, anders dann ez von alter sei hercho^emen, doran in vnd der stat ire recht gechrenchet vnd abgenomen werden, Vnd daz man auch hi^e vor auf dem Lande schenkch an der steten, da ez von alter verpoten ist, daz auch di^e recht beru^er, di^e dieselben vnser Pu^erger von alter von vnz vnd vnsern vordem habent, alz si vnz dez alles mit iren v^orchu^enden ermant vnd beweyset habent, Do von enphelhen wir di^er ernstlich vnd wellen, wa daz, di^e selben vnser Pu^erger an dich pringen, daz dv daz vnderstest, vnd werest, daz daz nicht mer geschech, vnd daz dv Si vnd di^e stat, pei iren rechten vestichlich haltest, von vnsern wegen, wann daz gentzlich vnser mainung ist. Geben ze Wi^enn am Sampcztag nach dem Heiligen Auffert Tag Anno LXX°VIJ°. +

Source Fulltext: OÖUB 9 (Wien 1906), S. 255-256