Wir Ffriderich von gotes gnaden Burkgraue zu Nu^eremberg vnd wir Elspeth sein Swester, Grauen Vlriches von Schawemberg seligen wytibe Bechennen offenlichen mit dem brieue, daz wir schuldig worden sein vnd geben sullen den Hochgeborn Fürsten Herren Otten des Heyligen Römisschen Reiches Erczkhamerer, Kurfürsten, Hern Stephan, Hern Ffriderichen vnd Hern Johansen gebrüdern des egenanten Hern Otten Vettern, allen von gotes gnaden Pfalnczgrauen bey Reyn vnd Herczogen in Beyern etc Achtausen guldein, vnd vmb dieselbe Acht Tausent guldein, haben wir Jn mit rechter wissen vnd mit wolbedachtem müte Recht vnd redlichen eyngeantwort vnd verseczt in rechter pfantschaft weis die Vest, Pfleg vnd Herschaft zu Julbach mit allen Eren, Rechten, Nüczen, Gülten, Czinsen, Gewonheiten, Gerichten vnd mit allen sachen vnd zugehörden, besuchten, vnd vnbesuchten, wie daz genant mag gesein, nichts auzgenomen, daz sie die egenant Pfleg vnd Veste vnd Herrschaft also eynnemen sullen vnd nyessen in aller masse vnd weise, als oben geschrieben stet, als lang, biz daz wir sie ire erben vnd nachkomen ermanen mit den egenanten Acht Tausent guldein güter von golde vnd swer von gewichte gnüg, güter vnd gäber vnd wenn wir sie danne also ermanen mit den egenanten Acht Tausent guldein, So sullen sie ire Erben vnd Nachchomen vns vnsern Erben vnd Nachkhomen, oder wenn sie ire Erben vnd Nachkomen vnsere Erben oder nachkhomen also ermanen, alleczeit losung stat tün on allez geuerde. Vnd ob sie darumb icht angvnge, von dem von Schawemberg, in welche weis daz were, des sullen wir sie alleczeit trewlichen vnd vngeuerlichen vertreten gegen dem von Schawemberg mit dem Rechten. Mit vrchund dicz brieues versigelt mit vnsern anhangenden Jnsigeln. Der gegeben wart ze Nüremberg, Nach Cristi geburt Drewczehen hundert Jar vnd darnach in dem Syben vnd sybenczigistem Jare des nehsten Samstages nach Pfyngsten.

Source Fulltext: OÖUB 9 (Wien 1906), S. 261-262