Ich Jans der Pekchelhüb vnd ich Albrecht sein Pruder vnd mit sampt vns Niclas der Haebichler vnser Veter vnd all vnser Eriben, wi^er veriechen vnd tun chunt allen den div den Pri^eff an sechent oder hörent Lesen div nvn Lebent vnd hernach Chvnftig wernt daz wir mit woluerdachtem mut vnd nach gunst vnser Pesten vrewnt Rat zu der zeyt, do wir ez wol getün machten liepleichen vnd vrewntleichen gericht vnd geebent haben mit Fridreichen dem Lechen vnd mit allen seinen Eriben vmb div zu^esprüch div wir eegenant Prüder vnd mit sampt vns vnser vorgenanter vetter Nyclas der Hebichler vnd vnser eriben von dez gu^etz wegen genant auf der Starchenöd in Talhaimer phfarr daz vnser rechtz väterleich erib ist gewesen, daz wir vns dez verczeichen vmb einen gelt daz wir von in gancz vnd gar gericht vnd gewert sein. Also mit awzgenomen warten, daz wir für bas dhain züspruch gen dem egenanten güt nicht schullen haben weder mit recht noch an recht, wer awer daz ob in an der verczeichnuss div wir tan haben dez obgenanten gutz wegen ichcz abgieng oder schaden nemen, von vnsern wegen, wie sich daz fu^egt, den selben schaden schullen wir in ablegen vnd widercheren an allew widerred daz selbig daz schullen sew haben dacz vnsern trewn vnd dar zu auf all vnser hab div^e wir haben in dem lant ze Österreich oder wo wir div haben versucht vnd vnuersucht oder wie daz daz (!) genant sey vnd daz div sach vnd div Handlung fürbas also stet vnd vnzebrochen beleyb dar vber zu einem waren vrchund geben wir Ich Egenanter Jans der Pekchelhub vnd ich Albrecht sein Prüder den prief versigelt mit vnsers lieben Vetern Niclos des Haebichler Anhangunden Jnsigel dar vnder wir vns payd verpinten mit vnsern trewn an aydes stat alles daz stet ze haben, daz oben an dem Prief geschriben stet, wenn wir zu der seben (!) zeyt aygner insigel nicht gehabt haben vnd versigelt mit vnsers lieben vetern Dietreichs dez Habichler Anhangunden insigel der daz an den prief gehangen hat durich vnser vleizzigen pet willen im an schaden. Der Prieff ist geben noch Christi gepurd Drewczehen Hvndert iar darnach in dem Acht vnd Sybenczkisten iar dez Eritages vor vnser vrawn tag zu der Chvndung in der Vasten.

Source Fulltext: OÖUB 9 (Wien 1906), S. 412-413