Ich Ru^eeger der Elter von Starhenberch von Wiltperch mein Hausfraw^e vnd alle vnser erbn, die wir habn oder noch chu^onftichleich gewingen veriehen vnd tu^on chund offenleich mit dem prief allen den di in sehent, ho^erent oder lesent, Daz wir mit wolpedachtem mu^ot vnd mit Rat gunst vnd vnd (!) willen vnserer nachsten freunt zder zeit vnd wir ez mit recht wol getu^on mo^echten Recht vnd redleich verchauft vnd ze chauffen haben gegeben dem erbern weschaiden Vlreichen dem Sampner pu^orger ze Lintz seiner hausfrawn vnd allen iren erben di sy habent oder noch chu^onftichlich gewingent, Vnsern Tu^ern genant zdem Höflein glegen pety Otenzhaim, daz vnser rechtz aygen gewesen ist vnd haben in auch daz für rechtz aygen ze chauffen gegeben, daz sy da mit wol allen iren fru^omen mügen geschaffen also rechtz aygens recht ist, Vnd zwen Höf genant ainer auf der Lakchn vnd der ander der Stainhöf vnd zwo Hofstät vnd Mül alles gelegen in Höfleiner Pharr vnd pey dem Turn ze Höflein mit allen den Eren rechten vnd nützen vnd Gülten, di da von mügen bechömen vnd auch überal dar czu^o gehörent, Es sey wizzent oder vnwizzent, wie di genant sind vnd wo di gelegen sind auf wazzer oder auf Land ze Holcz oder ze Veld, ze Do^erff mit wizmad vnd mit wayd, Pu^erchrecht, Akcher oder Paw(m)garten, vnd wie daz alles genant ist mit aller irer zu^ogehöru^ong versu^ocht vnd vnuersucht als ez von alter herchomen ist, nichtz auzgenomen, wann daz Chirchlehen ze Höflein gelegen mit aller seiner zu^ogehöru^ong vnd die Wis ze Walting, vmb ein gelt, dez wir gancz vnd gar von in gericht vnd gewert sein warden ze rechten Tägen vnd an allen vnsern schaden. Wir antwu^ertten in auch die obgenanten Stu^okch alle ze Ho^eflein vnd waz oben an dem prief benennet ist mit aller irer zu^ogehöru^ong auz vnserer nu^otz vnd gewer in ir nu^otz vnd gewer, Vnd sein au^och der ir gewer vnd fu^orstand, swo in dez not vnd du^orfft geschiecht nach dem Landes recht ob der Enns, vnd also rechtz aygens recht ist. Ging in aber mit recht an der gewerschaft ichtz ab oder daz in dhain Chrieg oder Jrrung da von auf erstu^end, von swem daz wer, oder swie sich daz gesu^oegen mächt, Swie getanen schaden si dez nämen, den si oder ir erben ir ains pey seinen trewn an ayd vngesworn vnd an alles recht gesprechen ma^ocht, den selben schaden zu sampt dem Haupgu^ot schullen wir in gänczlich ablegn vnd wider chern vnd sullen si daz haben ze vns vnd vnsern trewn vnd auf aller vnser hab, swo wir die haben vnd wie die genant vnd gelegen ist auf wazzer oder auf land versu^ocht vnd vnuersucht, Ez sey an Ligu^ontz freis aygen verlechentz oder varu^ond Hab, wir sein lemptig oder tod, wo si die anchöment oder swer dweil (!) vnser Hab nach vns vnd vnsern Erben inne hiet mit vnserm willen oder an vnsern willen, Vnd der sullen vnd mügen sy sich wol vnder winten, wo si dar auf choment an chlag, an fürbot vnd an alles recht vnd daz selb ist alle zeit vnser gütleich willen vnd wer da selbz Herr, Richter oder Phleger wär in der Herschafft oder gepiett, si auf vnser Hab choment, die sullen in die in anttwu^orten vnd schirmen vor uns vnd vnsern Erben vnd daz ist gänczlich vnser willen vnd sullen wir niemant dar vmb dester veinter sein, sy/o mügen auch allen iren fru^em mit derselben Hab, da si auf choment, schaffen vnd daz su^ollen vnd wellen wir weder mit Recht noch an recht in dhainer weiz wider sein, vntz so lang, daz si Haupgu^otz vnd schadens gar vnd ga^enczlich von vns bechoment vnd gewert werdent vnd daz alles luben wir in stät ze haben mit vnsern trewn an aydes stat vnd an alles geuärde. Daz in die red stätt vnd di Handlung vntzebrochen peleib, dar über so geben wir in den prief versigelt mit meinem anhangunden Jnsigel vnd zu pessrer sicherait vnd bezeugnüzz versigelt mit meins Lieben Vettern Herrn Ruegers des jüngern von Starhenberch vnd mit meiner lieben Öhaim der Erben (!) Hern Herren Hainreichs von Walse die zeit hauptman ob der Enns vnd Herrn Ruedolfs von Waise hauptman ze Grätz, die zeit vnd mit meins lieben Öchaims Hern Gündakchers dez Tannberger aller anhangunden Jnsigeln, die si durch vnser fleizzigen pet willen all an den prief habent gehangen zu^o einer zevgnu^ozz in vnd iren erben an schaden. Der prief ist geben nach Christes gepu^erd Dreutzehen Hundert jar vnd dar nach in dem Ächt vnd Sybenczkistem jare, dez Montages vor dem Palben tag.

Source Fulltext: OÖUB 9 (Wien 1906), S. 418-420