Wir Leutolt von gots gnaden Herczog ze O^esterrich ze Steyr, ze Kernden vnd ze Krain, Graf ze Tyrol zc. veriehen vnd tun kunt offenlich mit disem brief für vns vnd vnser erben, Als vnser lieben getrewn Peter von Torberg vnser Hofmaister, Hans von Träwn, Leupolt pharrer ze Medlik, Hans Kneuzzer, Nyclas Würffel, Niclas Stainer bürger ze Wienn, Hans Stainhülber die zeit Mautter ze Lyncz, Niclas Gülher die zeit Richter ze Ens vnd Hertel Kramer bürger ze Wels, gen dem edeln vnserm lieben Öheim Graf Hainrichen von Schawnberg für zway tausent phunt wienner phenning, die er vns berait gelihen hat, Selbgeschol vnd purgel worden sind, Haben wir in verhaizzen vnd gelobt, verhaizzen vnd geloben auch wizzentlich mit disem brief, daz wir si vnd ir erben, an allen schaden dauon ledigen vnd bringen wellen, an alle geuerd. Mit vrkund dicz briefs. Geben ze Wienn an Freitag vor sand Jörgen tag. Nach kristi gepurt dreuczehen hundert Jar darnach in dem Acht vnd Sibenczigistem Jare. Dominus Dux per se.

Source Fulltext: OÖUB 9 (Wien 1906), S. 425-426