Ich Margret Wolfharts seligen witib von Nydernwinchkel vnd ich Hertneid vnd Seyfrid vnd Wolfhart vnd Eberhart vnd Janns ir Su^en vnd ich Anna vnd kathrey ir Töchter, vnd alle vnser erben, die wir haben oder gewinnen veriehen offenleich an dem brief vnd tu^een chunt allen den die in sechent, hörent oder lesent, die nü lebent oder chünftig werdent, das wir mit wolbedachten mu^eet vnd gu^etem willen aller vnser erben vnd günst nach vnser nagsten vnd pesten freünt Rat zu der zeit, do wir es mit Recht wol getuen möchten, Recht vnd Redleich versaczt haben vnsern Hoff zu Waltenfelt gelegen in Gallnew^onchircher pharre vnd ünser Rechts aygen ist vnd den ich Egenant Margrett vnd meine Chinde chauft haben von meiner lieben Mu^eeter So^ejpheyn der pyrsin vnd von allen meinen geswistreyden, denselben vnsern egenanten Hoff haben wir versaczt dem Erben Herren Hern Ruegern von Starchenberchk von Wiltperch vnd allen seinen erben, die er hat oder gewinnet vmb Hundert phunt wienner phenning, die si vns berait dar auf gelichen habent an rechten no^etten vnd der wir von in schon verricht vnd gewert sein, vnd beczalt ze rechten taegen an allen vnsern schaden vnd haben in den versaczt aus vnser nu^ecz vnd gewer in die iren mit allen den Eren nu^eczen vnd rechten die dar czu^ee gehorent, oder dauon bechömen mogen czü Holts, ze vellde versucht vnd vnuersucht, wir sein auch des vorgenanten Sats (!) ir rechter gewer vnd fu^erstant, für alle ansprach, wo in des notdu^erft geschicht mit recht, als Satzes vnd Landes recht ist ob der Enns. Gieng in aber an der Gewerschaft icht ab mit recht, wie getanen schaden si des fu^erbaz neme, den ir ains bey seinen trewn, an ayde, vnd vngesworen vnd an alles recht gesprechen möcht, denselben schaden allen, wie der genant ist, sullen wir in gants vnd gar abtuen vnd wider cheren an alle wider red vnd sullen si daz haben auf vns vnsern trewn, dar czue auff aller vnser hab, die wir haben oder gewinnen oder lazzen, auf wazzer oder auf Landt, ynner Landes oder auzzer Landes, versu^ocht oder vnuersu^ocht. Wi^er haben auch vollen gewalt alle iar ierleich den egenanten vnsern Hoff ze Waltenfelt herwider ze lösen vmb die vorgenanten pfennig vor Lichtmezze virtzehen tage oder hernnach vber virtzehen tage; das die Handlung vnd Red also furbas stet vnd vnuerchert beleibe, dar vber geben wir in den Brief ich Egenanter Hertneid vnd Seyfrid baide Brüeder der vorgenanten vrawn Margreten Sün versigelten vnd besta^ett mit vnser baider aygen angehangen Jnsigeln vnd zu einer pessern sicherhait vnd auch zeügnüzz mit vnsers lieben Ohaim Charleins des Pyrsen vnd mit vnsers lieben Öhaim Vlrichen des Pawssen vnd mit des erbern Albr(echt) des Tannpechken dietzeit Phleger zu der Vreinstat mit ir aller angehangen Jnsigeln versigelt, die si daran gehangen habent durch vnser vleissigen gebett willen dem egenanten Pawssen vnd auch Tannpechken vnd allen iren erben an schaden, dar vnder die insigel alle ich egenantew Margret vnd ich vorgenanter Wolfhart vnd ich Eberhart vnd ich Hanns ir Sün vnd Anna vnd kathrey ir töchter vnd alle vnser erben, die wir haben oder gewinnen mit vnsern trewn verpinden an aydes stat, alles daz stet ze haben vnd zu^o volfüren daz oben an dem brief geschriben stet, wanne wir die czeit nicht aygen Jnsigeln gehabt haben. der brief ist geben do man zalt von Christs gepurd vber drew czehen hundert jare, dar nach in dem ächtt vnd Sybenczigistem iare an dem Heyligen Prehentage.

Source Fulltext: OÖUB 9 (Wien 1906), S. 371-373