ICH Thoman der Appfeltaler, mein hausfraw vnd ich Anna vnd Elzpet her jacobs des Elreychinger saeligen To^echter vnd all vnser Erben wir veriehen offenbar mit dem brief allen den, di in sehent, ho^ernt oder lesent, Daz wir recht vnd auch redleich versetzt haben vnsern zehent, waz vnsers tails ist, den wir haben in dem wayntal mit allem zu^e geho^ern Otten dem Stuechkla^er Burger ze Obernperg, seiner hausfrawn vnd allen iern Erben vmb Syben pfunt wienner pfenning, di si vns berait dar auf gelyhen habent. wir haben in auch den vorbenanten zehent, alzo wir den selber inn gehabt haben, geantwurt aus vnser nutzz vnd gewer in Satzz weis in ir nutzz vnd gewer vnd sein dez ir gewer vnd furstand, wo in dez not geschiecht, alzo dez Landes recht ist. wa^er aber, ob si von dez Satzz wegen ycht Chrieg an gieng, daz wa^er von vns oder vnsern Erben vnd dez si schaden naemen, den selben Chrieg vnd schaden allen su^ellen vnd wellen wir in gantz vnd gar aus richten vnd widerchern vnd su^ellen si daz auf vns vnd auf aller vnser hab, wo wir di haben oder lazzen, si sey besucht oder vnbesu^echt, (haben) vnd waz wir oder yempt von vnsern wegen dar vmb mit in Chriegen, rechten oder muetwillen mochten, daz su^ellen si alz behabt haben vnd wir verlorn. wir haben auch losvng alle jar ze sand Go^ergen tag in den acht tagen vor oder in den acht tagen hin nach vmb di voruerschriben Syben pfunt wienner pfenning, di dann gib vnd ga^eb sind, an allen abslach. Vnd daz in, oder wer den brief mit irem willen inn hat vnd fu^er pringt, daz alzo sta^et beleib, Gib ich in den brief mit meim obenanten Thomans dez Appfeltaler anhangundem jnsigel, dar vnder wir vns alle, alzo wir voruerschriben sein, vnd all vnser Erben verpint an geua^er alles daz staet ze haben, daz vor geschriben stet. Daz geschach an sand Margarethen tag nach Christi gepu^erd drewtzehen hundert jar, dar nach in dem a^echt vnd Sybentzgistem jar.

Source Fulltext: OÖUB 9 (Wien 1906), S. 479-480