Ich Ludweyg ab dem Stayn vnd mein Hau^osfraw^e. Vnd all vnser Erben, Wir veriehen offenlich mit dem prieff allen Lewten gegenbu^ertigen vnd chünftigen, Daz wir vnser Genedigen Herren Hern Rudolffen von Waltse vnd Hern Iorigen seinen Vettern, vnd all i^er Erben gantz vnd gar ledig lazzen haben vnd lazzen sew auch ledig mit dem gegenbu^ortigen prief, aller der zu^espru^och die wir ye hintz in gehabt haben, mit priefen, oder an prief es sey vmb Geltschuld von Parigschaft wegen, von dez pawz wegen ze Reychenaw^e, oder von dienstez wegen vnd wie all zu^ospru^och genant oder gehaizzen mu^egen, die wir zu vnsern vorgenanten genedigen Herren gehabt haben vncz auf den heutigen tag, Si seind von Hern Eberharts seligen wegen, wie die genant sint, der hab wir sev gancz vnd gar ledig lazzen, also das wi^er noch vnser Erben, hintz in noch hincz iren Erben noch hincz aller irer Hab daru^ober nymer mer dhain ansprach gehaben noch gewinnen schu^ellen, weder mit recht noch an recht, Wer aber das chain prief fürbas von vns fu^er cho^em, da mit wir in zu^osprechen wolten, die schu^ollen Tod vnd zu nichtew sein, vnd chain chraft nymer haben, an alain, der prief der do sagt, daz mich mein seliger Herr Her Eberhart von Waltse Hintz Erharten von Pogenhofen versatzt hat, Vmb Hundert vnd vi^ertzigk phunt phening, Was ich fu^erbaz nach dem heutigen tag, da von schaden nem, da schol ich meins priefz inn geniezzen, den ich von meim seligen Herren Hern Eberharten darümb hab, Waz sich aber vor dem heutigen tag vergangen hat, da sint si mi^er nichtz vmb gepu^onten, weder vil noch wenikch, vnd dez ze Vrchünd, Geben wir in den prief versigelt mit meins vorgenanten Ludweigs ab dem Stain angehangen Jnsigil, Der sach ist zeug Peter der Hinderholczer phleger ze Steyr mit seim angehangen Jnsigil, im an schaden, Der prief ist geben datz Sewsenek, nach Christes gebürt, Dreützehen hu^ondert Jar, darnach in dem A^echt vnd Sibenczigistem Jar, dez nachsten mitichen nach sant Vlreichs Tag.

Source Fulltext: OÖUB 9 (Wien 1906), S. 478-479