Wir Karl von gotes gnaden Romischer Keyser zu allen zeiten merer des Reichs vnd Kunig zu Beheim, Bekennen vnd tun kunt offenlichen mit diesem briefe allen den, die yn sehent, oder horent lesen, wann der Hochgeboren Albrecht Herczog zu Osterreich, zu Kernthen, zu Steyern zc. vnsir lieber Svn vnd furste, das Herczogtum zu Osterreich, vnd andir seine furstentume, Herschaffte Lande vnd Manscheffte, die von dem Romischen Reiche zu Lehen ruren, von dem Allirdurchluchtigsten fursten hern Wenczlan von Gotes gnaden Romischen Kunige zu allen zeiten Merer des Reichs vnd Kunige ze Beheim, vnserm lieben Svne als von eynem Romischen Kunige zu lehen empfehet vnd ym douon gewonliche gelubde Huldungen vnd eyde tüt, Dorumb mit wolbedachtem mute vnd rechten wissen Sagen vnd lassen wir den egenanten Herczogen Albrecht, der Lehenschafft vnd Huldungen, die er vns als eynem Romischen Keyser, furmals getan hat, ledig vnd los ane allis geuerde, doch mit dem vnderscheide, Sturbe der egenant vnsir Svn der Romische Kunig, ee, denne wir, do got vor sey, So sal denne der selbe Herczog Albrecht vns furbas als eynem Romischen Keyser, alle vnsir lebetage, mit der Lehenschafft seyner furstentumen vnd Lande, mit allen sulichen Huldungen, gelubden vnd eyden, in allir weyse pflichtig gehorsam vnd vorbunden seyn vnd bleiben, als er furmals vncz her gewesen ist, als das auch in desselben vnsirs Svnes Herczogen Albrechtis briefen, die doruber geben seint vollenkomenlicher ist begriffen. Mit vrkund dicz briefes, vorsigelt mit vnsir keyserlichen Maiestat Jngsigel, der geben ist zu Prage noch Crists geburte Dreyczehen hundert Jar, dornach in dem Acht vnd Sibenczigsten Jare an sante Maria Magdalen tag, vnsir Reiche des Romischen in dem drey vnd dreyssigsten, des Behemischen in dem czwey vnd dreyssigsten vnd des Keysertums in dem vier vnd tzwentzigsten Jaren.

Source Fulltext: OÖUB 9 (Wien 1906), S. 483-484