Ich Wernhart der Gnäwzz vergich für mich vnd für alle mein erben vnd tu^on ku^ond offenleich mit dem prief allen den di in sehent ho^erent oder lesent, Vmb di chag (sic) von dez Tuechs wegen, daz verloren ist warden vnd dar vmb meinem Herrn Her Hainreichen von Waltse di zeit Hauptman ob der Enns über mich diselb chlag chomen ist, Vnd mich auch dar vmb an meiner genädigen Hern der Herczogen von Ostereich Stat in seiner vanchnüzz gehabt hat, so lang vntz sich mein genädig Hern von Östereich vnd auch mein Herr Her Hainreich von Waltse dar inne aygenleich der varen habent mit guter chu^ontschaft, daz ich daran vnschuldig pin gewesen, Vnd vmb die selben vanchnu^ozz schullen vnd wellen wir mein genädigen Hern den Herczogen von O^estereich noch den iren, noch meinem Herrn Hern Hainreichen von Waltse noch den seinen noch dhainem der an der chlag noch an der Vanchnu^ozz di mir geschehen ist, schuldig ist gewesen, Nymmer mer dester veinter sein, weder mit warten noch mit werchen mit recht noch an recht in dhainer weiz. Wir schullen auch fürbaz über dhainerlay Handel wie sich der verging, auf der welt oder vor her vergangen hiet, an recht wider mein genädig Hern di Herczogen von O^estereich vnd die iren vnd mein Herrn Her Hainreich von Walse vnd di sein nimmer mer nichtz getu^on in dhainerlay weis vnd an als gevärd. Jch vergich auch, ob daz wär, daz ich mit einer gewizzen vnd redleichen Chu^ontschaft an die chöment mächt die an dem obgenanten Tu^och schu^oldig sind, daz ich gänczlich vnd an als gevärd der selben veint sein wil vnd iren schaden trachten wil, als ain Veind dez andern Veintz schaden trachten sol, alle die weil vnd sy meiner Hern von Österreich vnd Hern Hainreich von Walse genad vnd Hüld nicht habent, vnd daz ich obgenanter Wernhart Gnäwzz vnd mein erben daz allez, daz an dem prief geschrieben ist an alz gevaerd ga^ontzleich sta^et haben wellen, dez hab ich in Ein gestalten ayd hincz got vnd hincz den Heyligen gesworen, vnd gib dar über den prief versigelt mit meinem anhangunden Jnsigel vnd mit der Erbern meiner lieben öchaim Her Sygharcz vnd Phylippen gepru^eder der Stavffenperiger paider anhangunden Jnsigeln, di sy durch meiner fleizzigen pet willen zu^o einer waren sichtigen zeugnu^ozz an den prief gehangen habent in vnd iren erben an schaden. Der prief ist geben nach Christ gepu^ord dreuczehen Hundert jar vnd dar nach in dem ächt vnd Sybenczkistem jar an freytag vor sand Jacobstag.

Source Fulltext: OÖUB 9 (Wien 1906), S. 484-485