Ich Hanns von Trawn vergich für mich vnd alle meine Erben vnd tun chund allen den, dy den bryff sehent, lesent oder ho^erent lesen, dy nu lebent oder hernach chümftig sind, vmb dy Chapellen vnd Mess, dy ich in der vesten ze Trawn gestift han, als dy bryff sagent, dy dar über geben sind, daz mir her Dyetreich der pfarrer ze Heresing für sich vnd sein nachchömen erlawbt hat, alle pfärrleiche recht ze begen mit allem volkch, daz hawsleich in der vestt ze Trawn gesessen ist, als dy mit dem Graben vmbvangen ist vnd nicht verrer, ausgenommen der begrebnu^es, dy sol zu der rechten pfarr ze heresing geho^eren. Wär aber, daz der Capellan der Chapeln ze Trawn, wer ie der ist, des pfarrer Rechten sich mer vnder wient vnd ingriff, dann vorgeschrieben ist, das ein pfarrer redleich mit gueter chuntschaft geweisen mag, daz sol er an den Techent pringen, der sol inn dan dar vmb pessern, vncz er dem pfarrer daz wider tue. Tätt aber der Chapellan des selben nicht inner vierczehen tagen, so sol er an mess vnd vngesungen sein, als lang vncz er es wider tue vnd sol in der Bischoff oder der techent oder wer irn gewalt hat dar züe nötten. Mit vrchund des brifs, den ich in gib für mich vnd mein erben mit meim anhangunden Jnsigl vnd zü einer zewgnüsse mit meyns dyener lewtoldes des Stainrautter vnd levtoldes des holzer, dy zeit mein pfleger ze Trawn anhangunden Jnsigeln, dy sich (!) durch meyner pett willen dar an legt habent in an schaden. Der bryff ist geben ze Trawn nach Christes gepürde drewczehen hundert Jar dar nach in dem acht vnd Sybenczkisten Jar am Montag nach dem heyligen Pfingst tag.

Source Fulltext: OÖUB 9 (Wien 1906), S. 452