Ich Niclas der salichman von Phaffsteten vnd all mein erben wir veriehen — daz wir vnuerschaidenleich geben schullen Jzzerlein dem Juden, aron svn ze Wienn vnd seinen erben an zwai dreizzig phu^ont wienner phening, der wir si richten vnd weren schullen auf sand Merten tag der nv schirist chvmt, vnd waz si furbaz lenger stent, so sol gesüch darauf gen alle wochen auf ein igleich phu^ent vi^er wienner phenning vnd han in paidev für Haüpgut vnd für schaden ze phant gesaczt — mit vnsers gruntherrn Hant dez erbern Herrn Hern Stephans von Höchenwerch di vber mazz vber acht phunt wienner phening vnser drev virtail weingarten mit paw mit nüczen gelegen ze phaffsteten an der säzz vnd haizzet di Öd ze nächst dez vorgenanten erbern Herrn Hern Stephans von Höchenwerch weingarten, dem man alle iar raicht vnd dint do von vir vnd zwainczig wienner phenning ze purchrecht an sand Michelstag vnd nicht mer. Vnd wenn die vorgenanten Juden ires geltes nicht lenger peiten wellent, so schullen wir si weren Haupgut vnd schaden Jnner iares frist. — vnd sein auch wir der obgenanten drev virtail weingarten — ir recht geweren vnd scherm — alz phantes recht ist vnd dez Landez recht ze Österreich. Wir schullen si auch vmb Haupgu^et noch vmb schaden weder hincz Hof noch an dhain gewaltige Hant noch nindert allwo hin schaffen, denn daz wir si selber weren schüllen vnd daz, luben wir Jn allez ze laisten mit vnsern trewn an aidez stat vnd wand wir selb nicht aigen Jnsigil haben dar vmb so geben wir in den brif ze einem warn vrchünt der sache versigilten mit dez vorgenanten gruntherrn Jnsigel dez erbern Herrn Hern Stephans von Hohenwerch. wir haben auch vleizzig gepeten Vlreichen den Sleinczer von Dreschirchen, daz der auch sein Jnsigil an den brif gehangen hat cze einem waren gezeug der sache im an schaden Der bri^ef ist geben nach Christi gepurd drevczehen Hvndert iar darnach in dem a^echt vnd sibenczigisten iar dez eritags an sand Veytes tag.

Source Fulltext: OÖUB 9 (Wien 1906), S. 467-468