Ich Anna die Weygantin vnd ich Fridrich der Predinger ir aydem vnd all vnser erben, — vergehen — Daz wir verchawft haben vnser guet daz gelegen ist in dem Enstal ob Slebnig vnd ist gehaizzen an dem geswant da Christan der Holczpokch aufgesessen ist, daz vreys aygen ist vnd ain alben da pey die von dem Erwirdigen vnserm genedigen Herren den Tu^enbrost von Salczburg zu lehen ist, dem erbern mann Otten dem Albmer czu Awzse seiner Hawsfrawn vnd allen iren erben vmb fümf vnd Newnczig phünt güter wienner phenning, — vnd haben in auch daz vorgenant guet vnd alben geantwurt — in ir nucz vnd gewer vnd haben vns dhayn gewer noch rechten selben daran nindert gehalten — wir haben inz ouch geantwurt mit allen den eren rechten nüczen vnd gesüchen die dar zü gehörnt — alz wirs vnd vnser vorvodern in aygens vnd in lehens gewer herpracht vnd ynne gehabt haben, wir schullen auch dez vorgenanten gütz vnd allen ir fu^orstant vnd scherm vnd gewer sein, vor aller ansprach wo in dez nöt vnd dürft geschiecht, aygen als aygens recht ist, lehen, alz lehens recht ist in dem Lant zu^o Steyer. — — Daz in daz allez stet vnd vnzebrochen von vns peleib, daz oben an dem prief geschriben stet, dar über geben wir in den offen prief pesigelten mit meins egenanten Fridrich des Predinger aygen anhangunden Jnsigel pesigelt vnd zu ainer pezzern sicherhait vnd geczewgnüss der warhait haben wir gepeten den Erbern Eiblein zü Eybeswald, daz der sein Jnsigel zü dem meinen an den prief gehangen hat, im vnd seinen erben an schaden, So verpint ich mich egenant Anna die weygantinn vnd ich Fridrich der Predinger i^er aydem vnd all vnser erben allez daz stet zu^o haben vnd zu^e volfüren daz an dem prief geschriben stet. Der prief ist geben nach Christes gepu^ert vber drewczehen Hundert Jar dar nach in dem acht vnd Sibenczgistem Jar des mantags nach sand philipps vnd sand Jacobs tag der heiligen zwelifpoten.

Source Fulltext: OÖUB 9 (Wien 1906),S. 434-435