Wir Graf hainreich zw Schawnberch bechennen fur vns vnd alle vnfer Erben offenleich mit dem brief allen den, die in sehent, horent oder lesent, daz wir chaufleich ze chauffen gegeben vnd verliehen haben alz chauffez vnd lehens recht ist, di hub genant dez Schiuers hub gelegen bey Pewrbach in der selben pfarr Chunraten dem zeller, seiner hausfrawn Alhaiten Rudolfz des Schiuers tochter vnd ir bayder leibez Erben, die si mit ein ander gewinnent, mit allen den ern, rechten vnd nutzen, di darzu gehorent vnd davon bechomen mugen, bey chlainen vnd bey grozzen besucht vnd vnbesucht, alz wir die selben inn gehabt vnd genozzen haben Also, daz si die furbaz inn haben vnd niezzen sullen, alz ander ir aygenhaft guter an vnser, vnserer Erben vnd aller ma^endleich irrung vnd hindernuzz, wir sein auch dez obengenanten chauffez vnd lehens ir rechter her scherm vnd gewer, alz dez landez vnd gerichtz recht ist, darinn di egenant hüb gelegen ist. gieng aber in daran icht ab, wie sich daz fuget, dez si ze scha^oden cha^omen, den sullen si haben vnd gewarttend sein dacz vnzern genaden. Mit vrchund dez briefez, den wir in daruber geben, versigelten mit vnserm anhangundem insigel, der geben ist nach Kristi geburd dreuczehen hundert jar vnd in dem acht vnd sibenczigisten jar an dem suntag vor dem Auffertt tag.

Source Fulltext: OÖUB 9 (Wien 1906),S. 442-443