Jch Ofmey die Fruelingerin vnd all mein Erben veriechen — vmb daz lechen gelegen ze Reichenstorff ze nachst O^ettgebh(ar)t(e)n, daz ich von meinem Herren Hern Vlreichen von Hazlaw ze lechen gehabt han vnd do er mir die Aygenschaft aufgeben hat vnd daz ich von meinem wirf O^ertolfen dem, Fru^olinger gechauft han —, dar vber han ich mich des verlubt vnd verpunden — gen dem erbern Herren Hern Vlreichen von Hazlaw vnd gen seinen erben, daz ich daz vorgenant lechen nyndert verhandeln noch verwandeln scholl an im willen oder wem wir daz vorgenant lechen geben oder wer ez in hat, daz es deselben auch nyndert vorhandeln (!) noch verwandeln schüllen an dez erbern Hern Gunst vnd auch willen —, geschech ez awer dar v^eber so schol der vorgenant Vlr(eich) von Hazlaw oder sein erben sich dez selben lechens vnder winden an alz recht vnd ob mir yemant vmb daz gu^ot zu spricht, daz scholl ich nyndert für antwurten, dan vor meinem Herren Hern Vlreichen von hazlaw oder vor seinen erben ich oder wer daz güt ynn hat, wer aber daz ich yndert verrer waygret daz güt für antwurten dan vor dem erbern Hern Hern Vlreichen von Hazlaw oder vor seinen erben, so schol ez im ledig sein — vnd schol auch der brief fürbas tod sein vnd chain chraft nicht haben, den er mir vber daz lechen hat gegeben. Daz de sach also stet vnd vnzeprochen weleib, dar vber gib ich im den brief zu einer waren vrchund der sach versigelt mit des erbern mans Jnsigell Otten des pechemrawter vnd Friedreichs dez Fru^elinger, wenn ich selb Aygens insigel nicht hab, So verpint ich mich hinder der erbern man Jnsigl mit meinen trewn an ayds stat alz daz stet zu haben vnd zu laisten, Alz vor an dem brief geschriben stet. Der brief ist geben nach christ gepurd drewczechen hundert Jar dar nach yn dem acht vnd Siebenczigisten Jar des Suntags vor Sand Vrbans Tag.

Source Fulltext: OÖUB 9 (Wien 1906), S. 441-442