Albertus dei et apostolice sedis gracia Episcopus Patauiensis, dilecto in Christo, Johannj Sinczinger presbitero nostre diocesis, Salutem in domino. Exigentibus tuis meritis, tibi, parrochialem ecclesiam in Gu^onschirichen eiusdem nostre diocesis, cuius quidem parrochialis ecclesie, collatio, seu prouisio, ad nos pertinere dinoscitur, vacantem, ad presens, per obitum, Iohannis Forster, vltimi rectoris illius, cum omnibus iuribus, et pertinencijs suis conferimus, et de ipsa prouidemus, teque per birretum investimus, presencialiter de eadem curam animarum, et administracionem spiritualium et temporalium ipsius, tibi presentibus conmittentes, mandamus itaque dilecto in Christo ~ rectori parrochialis ecclesie in Wels, vel eius vicario memorate nostre diocesis, et conmittimus eidem, quatinus te in corporalem possessionem dicte ecclesie in Gu^onschirichen, ac omnium iurium et pertinenciarum ipsius, inducat, et defendat inductum, ac faciat tibi de fructibus, redditibus, prouentibus, iuribus et obuencionibus, vniuersis, ad ipsam spectantibus, ab omnibus, quorum interest, integre responderi, Contradictores et rebelles, auctoritate nostra, per censuram ecclesiasticam firmiter conpescendo. Datum Patauie, die secunda, mensis Decembris anno domini Millesimo Trecentesimo, Septuagesimo octauo.

Source Fulltext: OÖUB 9 (Wien 1906), S. 539