Ich Weykhart der Mitterpech im Ekk, Vnd ich Dorothe sein Hausvraw Vnd all vnser Eriben, Wir für Jechen —, daz wir — mit vnsers Pu^ercherrn Hant gunst vnd willen des Erbierdigen geistleichen Herrn Herrn Lewtolts Probst czü sand polten — fu^er chauft haben vnsern halben Ho^eff Vnd auch vnser halbew Mu^ell dew do haist in dem dornech in Stainfelder Pharr do von man all jar Jerleichen dem egenanten Gotzhaus czu sand Polten Sechs wienner phening czü Pürchrecht dient auf Sand Michelzz tag, Vnd haben im auch geben den czehnt ganczzen auff dem halbem Hoff chlain vnd grozzen Vnd der czu lechen ist von dem erbern Herrn Herrn Weykharten dem tojpeller Vnd nicht mer, — Vmb Sechs Vnd sechczig phu^ent Wienner phenning — dem erbern chnecht Otten dem cherzpechen vnd sein eriben vnd hat auch sein vetterleich erib dor an gelegt fu^er was Ledichleichen Vnd freileichen czu haben — Vnd czu Pezzer sicherhait seczzev (!) wi^er vns — dem vorgenanten Otten dem cherzpechen Vnd sein eriben des obgenantem halben Hoffs vnd der halben mu^ell Vnd auch des czehent — czü rechtem gewer vnd scherm — des Purchrechts alz Purchrechts Recht ist, des Lechens alz Lechens Recht ist Vnd dez Landes Recht czü Osterreich —, Vnd der sach czü vrchünd so gib ich in egenanter Weykhart der Mitterpech im ekk Vnd ich dorothe sein Hausvraw vnd all vnser eriben dem erbern chnecht Otten dem cherzpechen Vnd allen sein eriben den bri^eff pesiglt mit meinem an hangvndem Jnsigel für mich vnd für all mein eriben wan ich vorgenantew dorothea selb aigns Jnsigel nicht enhan dor Vmb so fürpints ich mich mit meinem trewn Vnder des egenanten meines wiertz Jnsigell allz daz genczleichen stet zu haben so vor an dem briff geschriben stett, Vnd ist auch geczeug der Erbierdig geistleich Herr Probst Leutolt czu sand Polten Vnser Pu^erch herr mit seinem anhangvndem Jnsigell Vnd ist auch geczüg mein Prüeder Niclas der Mitterpech mit seinem an hangvndem Jnsigell Vnd ist auch geczeug Herman der czierfogell mit seinen anhangvndem Jnsigell Vnd ist geczeug Jans der Lienuelder mit seinem an hangvnden Jnsigell in an schaden. Der briff ist geben noch christs Gepu^erd drevczehen hundert jar vnd dor noch in dem newn vnd sibenczkisten Jar an sand Johanstag czu weinnachten.

Source Fulltext: OÖUB 9 (Wien 1906), S. 547-548