JCH Ott der Zella^er aus der Riedaw vergich vnd tun kund offenlich mit dem brief allen den, die Jn ansechent, hornt oder lesent vmb die vanchnu^es, da ich Jnne gewessen pin jn meines Herren Graf hainrichs von Schawnberg vnd die selben vancknus vmb in wol verdiennt han, da mich Erber Ritter vnd knecht vnd mein pesst frewnde mit Jr vleyssigen pett da uon pracht habent Also, das ich vnd all mein frewndt vmb dieselben vancknus, wie sich dj vergangen hatt, meinem vorgenanten gnadigenn Herren, sein Eriben vnd all den sein, wie dj genant sind, icht dester veinter sein vnd wider in vnd wider all sein Eriben nichts tu^en vnd han auch des vnserm gnadigen Herrn Graf Hainrichen ein starcken ayd gesworen, ob ich das yndertt v^eberfu^er oder yemannt von mein wegen, das ain gewissen ist, als oben an dem brief geschriben ist, So sol ich monaidig sein vnd soll vmb denselben monayd in kainem lant nichts geniessen, Man sol mir tu^en als andern Monaidigen lewten, ob ich pruchig wurd, da gott vor sey. Das dj punt also statt vnd vnzebrochen beleib, des gib ich vorgenanter Zellar den brief versiglt mit meinem anhangunden Jnsigl vnd zw ainer pessern si^echeraitt vnd vesten waren zewgnu^es mit meiner lieben brueder hainrichs vnd kunradt der Zellar anhangunden Jnsigeln, dj ir Jnsigl durich meiner vleissigen pett willen daran gehangen haben vnd darunder verpindt ich mich an aydes statt alles das trewlich statt zw halten, das oben an dem brief geschriben stett, Der Geben ist Nach kristi gepurdt drewzechenhundertt Jar darnach in dem Newn vnd Sibentzigisten Jarenn an Suntag vor sand Mathias tag des heiligen Zweliffpotten.

Source Fulltext: OÖUB 9 (Wien 1906), S. 581-582