Ich Hainreich der Posch purger ze der Vreinstat vnd mein Havsfraw^e vnd all vnser erben veriehen vnd tuen chund offenleich mit dem prief allen den di in sehent oder horent lesen, Daz wi^er mit wolbedachtem muet nach vnser nachsten vnd pesten frevnt rat vnd gunst, zu der zeit do wi^er ez mit recht wol getuen machten, Recht vnd redleich haben zu^e Chauffen geben, Dem Erberen mann Hainreichen dem Redinger vnd seiner Havsfrawn vnd allen i^or paider erben ein halbs phunt wienner phenning Ewigez geltcz auf vnserem Haws daz gelegen ist in der smid gazzen zu nachst Werenhartz des Halser Haws, vmb ein gelt dez wi^er gancz vnd gar von in verricht vnd gewert sein zu rechten tegen, Wi^er schullen in auch daz vorgenant halb phunt phenning raichen vnd geben halbz auf sand Jorigen tag vnd halbz auf sand Michelz tag. Ta^et wi^er des nicht, so schullen si vns oder wer das Haws in hat dar vmb notten vnd phenten alz Purchrechtz recht ist in der Vreinstat, Wer aber daz daz mein Herr der Herczog schuef gelt ab zu lösen auf dem Purchrecht oder auf anderen Pu^erchrechten, so schull wir in Acht phunt phenning geben vnd schullen si daz haben dacz vns vnd dacz vnseren trewn vnd darczue auf aller vnser Hab. Daz in di Red sta^et vnd vnuerchert weleib, Darvber gib ich obgenanter Hainreich der Posch in den offen prief versigelt mit des Erberen Mann Steffan des Guelher anhanganden (!) Jnsigel, zu der Zeit Statrichter in der Vreinstat vnd mit dez erberen mann Weichartz dez Schutzen purger in der Vreinstat anhangunden Jnsigel, die paid ir Jnsigel an den prief gehangen habent, durich vnser vleizzigen pet willen in vnd i^eren erben an schaden. Dar vnder wi^er vns verpinden mit vnseren trewn alles daz stet zu haben daz vor an dem prief geschriben ist wan wi^er zu der zeit aigner Jnsigel nicht enheten. Der prief ist geben nach Christi gepurd Drevczehen Hvndert Jar vnd in dem Nav^en vnd Sibenczkisten Jar dez nachsten Phincztagz nach||
sand Dorothea tag der Heiligen Jvnchfraw^en.

Source Fulltext: OÖUB 9 (Wien 1906), S. 580-581