Jch lippel der Entzendorffer vergich vnd tu^en kund mit dem brief allen, den Er zu horen vnd zu lessen fu^erkumbt, vmb dj vancknus, dj mich der Edl wolgeboren mein genadiger herr graf Hainrich zw Schawnberg angelegt hatt vnd dj ich wol vmb in verschuldet hett. Nu hatt derselb mein herre angesechen des Erwirden fu^ersten meines gnadigen herren pischoll (sic) albrechts zw passaw vnd der Edlen wolgeborenn auch meiner gnadigen herrn von Rossenberg vnd ander Erber lewtt, Herrn, Ritter vnd Knechten vleissig gepett vnd hat mich derselben vanchnu^es gantzlich vnd gnadigclich ledig lassen also mit der beschaiden, das ich wider den obgenanten mein herren, sein Erben, nachkomen vnd all dj Jren Nymermer nicht tu^en sol noch will in kainerlay weis; des han ich ainen aufgerechkten ayd geswaren hintz gott vnd allen Heiligen, Es war dan als vil, ob der fursten vnd herzogen von pairen oder von Osterreich ainer oder mer wider sy mit offen krieg sein wolden oder wa^eren, so sol ich meinem egenanten herren, oder sein Eriben mein dinst anpiettn, want sy mich dan aufnemen vnd tunt mir darumb, das ich Erleiden mag, als pillich ist, so sol ich pey Jn pleiben, War des nicht, so mag ich auf der obgenanten tail wol reitten vnd gedien an all Zuspru^ech vnd ob ich das anders v^eberfu^er vnd also nicht statt hiellt, so sol ich trewlos vnd manlos sein vnd sullen mir, dj hernachgeschribn stent vnd Jre Jnsigl an den brief gelegt habennt, al veint sein als mein obgenant Herrn vnd seine Eriben, Jch vnd all mein Erben von der egenanten vancknu^es wegen meinem vorgenanten herrn vnd seinen Erben vnd allen den Jrren vnd dj an meiner vancknis schuld haben, nicht dester veindter sein sol in kainerlay weis, daru^eber zw ainem statten vrkund gib ich in den brief versiglt mit meinem anhangunden Jnsigl vnd zw pessern sicheraitt vnd zewgnu^es mit mein liebn besundern frewndt herrn danckhartten den Hodleinsperiger Orttleins phleger zw sprintznstain vnd hansleins des Entzenstorffer auch anhangunden Jnsigl in vnd jren Erben anschaden, darunder ich mich vnd mein Erben vns verpinten mit vnsern trewn alles das statt zw hallten vnd zuuolfuren, das oben geschribn stett trewlich an alles geua^er. der prief ist geben, Do man zallt von kristi gepurdt drewzechenhundertt Jar, darnach in dem Newn vnd sibentzigisten Jaren an vnser frawntag als sy geporn ist.

Source Fulltext: OÖUB 9 (Wien 1906), S. 698-699