Ich Hainreich von Dachsperg, Hern Wolfgers selig Sun von Dachsperg, Vergich vnd tu^on kunt mit disem offen brief, Als ich der Herschaft, Vest vnd Stat ze Waidhofen vnd was dar czu^e gehört, in phandes weise, innhan, für Sechstausent vnd zway hundert guldein, vnd fu^er New^en hundert phunt wienner phenning, nach sag, der phantbrief, die dar über gegeben sind, Han ich dem durleuchtigen Hochgeborn fürsten Herczog Leupolten, Herczogen ze Österreich, ze Steyr, ze Kernden, vnd ze Krain, Grafen ze Tyrol zc. meinem lieben gna^edigen Herren, denselben Sacz recht vnd redleich, vnd mit gu^eter vorbetrachtung, gefu^egt, vnd gemacht. Also, ob ich ane Leiberben abgen, daz dann alle meine recht, die ich daran han, erben vnd geuallen süllen auf Jn, vnd sein erben, als Landes vnd gema^echtes Recht ist, ane alles geuer, Aber die edel fraw Chlara Hern Hainreichs von Meissaw tochter, mein liebe Gemahel, vnd Hausfraw, sol dennoch irs gelts, das ich i^er, darauf zu^e Morgengab vnd widerleg verschriben han, habhaft sein, als ir brief sagent, Doch mit solicher beschaidenhait, ob der egenant Satz in des obgenanten meins Herrn Herczog Leupolts vnd seinerr erben Handen kem, als vorgeschriben ist, So mu^egent si wol iren tail von ir ledigen vnd lösen. Vnd sol si dann, das gelt, das ir darumb gebürt, anderswa anlegen, an Erb, oder aigen, da man es wizz ze vinden, vnd sol das dar nach geuallen, dahin es ze recht gehört, ane alles geuer, vnd ob ich ain andre Hausfrawn nemend wurd, da mag ich auch, mit der Herschaft Hand vnd willen auf den egenanten Sacz vmb ir Heyratgu^ot geweisen, als ich die heutigen getan han, Bey welicher mir aber Got Kind geit, Sv^en oder Tochtern, die su^ellent, den egenanten Satz erben, vnd sol Jn die vorgenant Gemechtnu^ezz daran kain schad sein, So hat der vorgenant mein Herre Herczog Leupolt versprochen vnd gelobt, mich gnedikleich ze fu^erdern vnd ze schermen, wa ich des bedarf, vnd ob ich in dhainen krieg oder Veintschaft geuiel, das Got enwelle, So wil er mir gnedikleich geholfen sein, dieselben sach zu einem gu^eten ende zu bringen vnd mich vnuerdorben halten, vnd sol ich Jm darum volgen, Vnd des ze vrku^end, hiezz ich mein Jnsigel, henken an disen brief, vnd zu merer sicherhait, han ich gebeten, den erbern Herren, Hern Vlreichen von Liechtenstain von Muraw, vnd meinen gu^eten freund Reinharden den Wa^ehinger daz si ir Jnsigele, auch daran gehenkt habent zu einer geczewgnüzz in ane schaden, Daz geschach vnd ward der brief geben ze Wienn, an sand Matheus abend des heiligen Zwolfbotten vnd ewangelisten nach krists gebürt, Dreuczehen hundert iar, Darnach in dem Newn vnd Sibenczigistem Jare +

Source Fulltext: OÖUB 9 (Wien 1906), S. 701-702