Ich Pernhart der Aesenhaimer vnd ich Christein sein hawsurow vnd alle vnser Erben, wi^er vergehen offennleich mit dem brief vmb daz Haws gelegen in sand Johanns strazze ze Wienn vnd haizzet auf der pranntstat zenechst maister Chunrats Haws des Mawrrer, das wi^er gechaufft haben von dem Erbern Herren Hern Vlreichen dem Haselawer vnd von seinen erben als der chauf brief sagt den wir von Jn daruber haben, das wi^er vns des gegen demselben Hern Vlreichen dem Haselawer vnd gegen seinen erben mit vnsern trewn an alles geuer verlujpt vnd verpunden haben, ob das wer, das wi^er furbas an dem vorgen(ant) Haws das wi^er von Jn gechaufft haben icht chriegs oder ansprach gewunnen, von wem das wer, das Si des genczlich vnschadhafft vnd vnkolten sullen beleiben on alle weg. Wer aber das Si daruber derselben chrieg oder ansprach icht schaden nemen, wie der schad genant wer, denselben schaden sullen wi^er Jn genczleich ablegen vnd wider chern vnd sullen auch Si das haben auf vns vnuerschaidenleich vnd auf allem vnserm gu^et, das wi^er haben in dem Lannde ze Osterreich oder wo wi^er es haben, wi^er sein lebentig oder tod. Vnd daruber so geben wir dem vorgen(ant) Hern Vlreichen dem Haselawer vnd seinen erben den brief zu einem warn vrchund der sach versigilten mit vnserm insigil, der geben ist ze Wienn noch christes gepurd drewczehen hundert jar darnoch in dem Newn vnd Sibenczgistem Jar an sand Michels abendt.

Source Fulltext: OÖUB 9 (Wien 1906), S. 711