Wir Albrecht zc. Bechennen vnd Tu^on künt offenlich mit dem briefe, daz wir vnsere vesten vnd Herrschaft franchenburg vnd Aterse. die wir vmb vnser aigenhaft varend gu^ot haben gechouft, von dem Erwirdigen dem Byschof vnd der Stift ze Babenberg, mit allen den rechten, Leuten vnd Gütern, Gerichten, Mauten, Zinsen, zehenten, diensten, vellen vnd allen andern gülten vnd nützen, wie si genant sint, die dar czu^o gehörent, versatzt haben, vnd seczen auch wizzentlich vnserm getrewn lieben Hainrich von Walsse, vnserm Houptman ob der Ens vnd seinen Erben vmb sechs Tausent phunt . CCCC. t. vnd 1. phunt wienner phenning die er vns berait gelihen hat vnd damitte wir, dieselben vnser Herrscheften gelöset haben von dem edeln vnserm lieben getrewn Graf Hermann von Cyli, des satz si vor gewesen sint, darczu^o haben wir demselben von Walsse vnd seinen Erben darauf geslagen Sechsthalb Hundert phunt wienner phenning, die er an dieselben vnsre vesten paidt, wa vnd wie das aller notdurfogist wirt verpawen sol, mit ainer gewizzen, vnd wenn er, die also verpawt hat, So wirt die Svmme Sibentausent phunt wyenner phenning, dafür der obgenant von Walsse vnd sein Erben, die vorgenanten vnsere vesten vnd Herrschefte mit allen irn zu^ogehörvngen, als oben geschriben stet, von vns vnd vnsern Erben in Satzes weise. ane abslag der nucze, inne haben vnd niezzen sullent, Als lang, vncz wir, die, von jn gelösen vnd erledigen mit der obgenanten Svmme Siben Tausent phunten wienner phenning. Wenne auch wir oder vnser Erben damitte die losvng an si vorden, So sullen si vns, der gehorsam sein vnd stat tu^on vnuerczogenlich one alle widerrede. Ouch sullent si oder wer von irn wegen, die egenante vnser vesten vnd Herrscheften, inne hat, vns vnd vnsern Erben damitt gehorsam vnd gewertig sein vnd vns die offen haben zu allen vnsern notdurften vns vnd die vnsern darin vnd darauz ze lazzen vnd ouch darinne ze enthalten, wenn vnd wie oft vns des durft beschicht wider allermeniklich nieman auzgenomen, doch an iren merklichen schaden. Darczu^o haben wir dem obgenanten Hainrich von Walsse von sundern gunst, so wir zu im haben gelobt die nachgeschriben punt, des ersten. Geschech, daz yemant stöz mit vns Hiet oder gewunn vnd dauon ain Geliger (!) sein für die egenanten vnser vesten oder ir aine, die weil si des egenant von Walsse Satz also sint, waz Jm denn kosten darauf gieng, si ze behu^eten, daz wir jm das genczlich abtragen sullen auz vnser kamer, wer ouch, daz die Gu^eter derselben vnser Vesten und Herschefte von vnsern wegen oder von derselben Gu^etern rechten wegen beravbt, verprant oder sunst gewu^estet wurden, daz man des dienstes dauon nicht möcht bechomen, waz denn dienstes abgieng, den solten wir dem vorgenanten von Walsse vnd seinen Erben erstatten auz vnser kamer. Teten wir des nicht, So sullen si das gelt für die kost als es vorbenant ist vnd auch denselben abgang des dienstes auf dem Sacz haben ze geleicher weise, als ander ir Gelt, nach ir brief sag, Ob auch den egenant von Walsse, irs Gelts dorft beschech, daz si dez nicht lenger empern möchten, oder enwolten, wenn si vns denn losung anbietend, die sullen wir denn vnuerczogenlich von jn tu^on. Beschech des nicht, So mugent si darnach disen Sacz, vmb das Gelt, daz si denn darauf habent nach ir brief sag, fürbazz setzen, doch mit vnserm wizzen ainem der vnsern in vnsern Landen gesezzen vnd wer disen brief mit des egenanten von Walsse oder seiner erben, ob er nicht were, gu^otlichem willen inne hat, der, der vnser ist vnd in vnserm Land ist gesezzen, der sol alle die recht daran haben, die er selber hat, als da vor stet geschriben, Vnd sullen wir ouch den selben Satz dem besteten mit vnserm brief. Darüber so haben wir dem vorgenanten Hainrich von Walsse ouch gelobt vnd loben mit disem brief von besundern gnaden vnd durch der trewn vnd dienste willen, die er vns allweg erczaigt hat vnd noch fürbazz wol getu^on mag vnd sol, wer daz nv fürbaz zu^o dhainer zeit, die weil er den Sacz inne hat, wir oder vnser Erben, dieselbe vnsere Vesten vnd Herschefte paide, oder ir aine, wider verchauffen wolten, daz wir der, denn fu^er den egenanten Hainrich von Walsse niemant gvnnen wellen, Sunder wir sullen Jm die vor meniklich ze chauffen geben in der mazze, alz wir si gechouft, vnd an vns pracht haben, ob der das aufnemen wil vnd mag, also, waz des Geltes wirt, über das, so er denn nach seiner saczbrief sag, vor dar auf hat, daz er, das, vns oder vnsern Erben, richt, inner Jarsfrist vnuertzogenlich, darnach so derselbe chouf beschicht, Vnd darüber ze vrchund vnd sicherhait, So geben wir dem egenanten Hainrich von Walsse vnd seinen erben disen brief versigelt mit vnserm grozzen anhangvndem Jnsigel, der geben ist ze Wyenn an dem Heiligen Auffart tag Anno zc. LXXIXo.

Source Fulltext: OÖUB 9 (Wien 1906), S. 635-637