Dem allerdurleuchtisten hochgeborn fursten vnserm lieben gna^edigen herren hern Wenczeslawen Römischem Künig zu allen zeiten merer des reichs vnd Künig ze beheim, em(biet)en wir Leupolt von gotes gnaden herzog ze Österreich, ze Steyer, ze Ka^ernden vnd zv Krain, herre auf der Windischen Marich vnd ze Portenaw, graf zu Habspurg, ze Tyrol, ze Phyrt vnd ze Kyburg Marggraf ze Burgaw vnd Lantgraf ze Elsazz, vnsern steten willigen dienst mit ganzen trewen. Als der hochgeborn fürst, vnser lieber Bru^oder herzog Albrecht, vnd wir vnsere land vnd herscheft willikleich mit einander getailt haben, vnd vmb gema^echtnüzz derselben landen vnd herscheften bru^oderleich überain komen sein, nach sag der tailbrief vnd gema^echtbrief, die wir baidenthalb darüber gen einander geben haben, bitten wir mit allem fleizz vnd ernst, als wir ew nechst selber vnder augen baten, das ir die selben tailung, gema^echtnu^ezz vnd brief, die darüber geben sind, geru^ochet ze besta^eten, so soll das ew, vns vnd vnser baider erben, an der pu^entnüzz vnd gemechtnüzz, die zwischen vns vormalen beschehen sind, kain schad sein, vnd sullen die hantueste vnd brief, die ze baider seit dar über geben sind, dennoch bei irn kreften genczleich beleiben ane alles geva^er. Mit vrkünd dicz briefs. geben ze Gra^ecz an Samztag in den heiligen weichnachten, nach krists gebürt, dreuzehen hundert jar, darnoch in dem achzigisten jare.

Source Fulltext: OÖUB 9 (Wien 1906), S. 768