Ich Hans von Trawn, Chorherr ze Pazzaw^e. vnd Pharrer ze Absteten, vergich vnd tu^en chund allen, di den prieff sechent hörent oder lesent, di nu sind, oder hernach chunftig werdent, Daz ich mit wolbedachtem mu^et vnd mit willen, vnd nach rath, zu der zeit, do ich es wol getün mocht, gemacht vnd gegeben han, meinem lieben prüder, Hern Ha^ertneiden von Trawn vmb prüderleichew lieb, die er mir oft vnd dikche erczaigt hat, vnd auch noch heüt tüt, all mein hab, wi^ee di genant ist, si sei versücht oder vnuersücht, erib oder aygen, pürchrecht oder lehen, oder säcze, oder waz mich von meinem lieben Herren vnd vater, Hern Hansen von Trawn vnd auch von meiner lieben mu^eter säligen, an geuelt, oder an geuallen ist, wes ich recht han, wo daz leit oder gelegen ist, daz ich dez niemant paz gan, denn meinem lieben pru^eder Herrn Härtneiden von Trawn, Er sol vnd mag auch mit derselben meiner Hab, tu^en vnd lazzen, als mit anderr seiner Hab, zu aller seiner nottu^erft, ze versetzen vnd ze verchauffen, vnd geben wem er wil, daz er dar an von meinen wegen, noch von andern meinen prüdern, dhain engung noch irrung nicht haben sol, wann ich ims vor aller mänichleich gemacht vnd gegeben han, jn sölicher mazz daz er mir sein prüderleichew trew auch erczaigen sol, zü aller meiner nöttürfft, als er vor getan hat, Vnd dar vmb hab ich mich zü im verphlicht, daz ich in nicht lazzen wil mit alle vnd ich gewinn vnd han, so waiz ich auch wol, daz er mir dasselb herwider tüt, vnd mich an dhainen nöten lät, Daz daz also sta^et, vnd vnuerchert beleib, dar vber gib ich im den offen prieff versigelten mit mainem aygen anhangundem Jnsigel. Vnd zu ainer pezzern ürchund vnd sicherhait, vnder der erbern Herren Hern Ha^ertneidez von Losenstain vnd Hern Ha^ertneidez vom Degenperg, anhangunden Jnsigeln, di sew dürch meiner fleizzigen gepet, daran gehangen habent, in an scha^eden. Der prieff ist geben Nach Christi gepu^erd vber drewtzehen Hundert Jar. darnach in dem Newn vnd sibenczkistem Jar, an sand Thömans abent, dez Heyligen zwelifpoten.

Source Fulltext: OÖUB 9 (Wien 1906), S. 766-767