Ich Härtel von dem Rotenmann, ich Marquart Tanpekch, ich Ekchart Prenner vnd ich Jacob der Lauterwekch veriehen offenlich mit dem brief, daz wir versprochen haben, vnd ver¬0sprechen auch mit dem brief, vnßerm genaedigen Herrn Hern Pilgreim Erczbischofen ze Salczburg, Legaten des Stu^ols ze Rom vnd seinem Gotzhaws ze dienst füren vnd halten, ich obgenant Haertneid von Rotenman, zwen Spiezz vnd zwen Schüczen, ich Marquart Tanpekch, ainen Spiezz vnd ainen Schützen, ich Ekhart Prenner zwen Spiezz vnd zwen Schüczen vnd ich Jacob Lauterwekch ainen Spiezz vnd ainen Schüczen, mit vns selb vnd erbern läuten, vnd Harnasch, daz dar zu^o ge¬0hört vnd nucz sei getrewlich an geuer, in dem gegenbürtigen chrieg, den er hat, mit Wilhahn dem frawnberger von dem hag vnd mit seinen Helffern oder wo vns vnser egenanter Herr oder sein Goczhaus mit den vorgenanten laüten hin mainet, in dienst ze nützen vnd dor vmb hat vns vnser obgenanter Herr von Salzburg, ganczes Soldes, von heutigen tag auf ein gancz Moneid, an allen vnsern schaden fürderleich ausgericht vnd bezalet, Wär auch daz wir oder vnsser obgenant gesellen, die weil der dienst weret, icht redleich redleich (sic) schäden nämen, auf dem veld, in vnssers egenanten Herrn dienst, mit der Hawptlawt wizzen, vnd weisung, die vnser vorgenanter Herr oder sein geschäft dar zu seczt, es sei an rozzen, an Hengsten, oder an vanchnüzz, diselben schäden schol vns vnßer vorgenant Herr von Salzburg oder sein Goczhaus wider chern nach seines Rates Rat, also waz derselb dor vmb sprichet, dez genügt vns, vnd sol dabei beleiben, wir schüllen auch dieselben schäden inner zwain Moneiden nach dew, vnd derselb Sold ausget, mit redleicher weisung vordern vnd melden, an vnsern vorgenanten Herrn von Salzburg oder sein nach chömen, vnd an wew wir dez nicht täten, dez wär man, vns, nach den zwain moneiden nicht gepunden, Ez ist auch der offtgenante vnser Herr von Salzburg, vnd sein gotzhaus vns alain, vnd nicht vnßern vorgenanten gesellen, vmb die schäden gepunden, von der vorgenanten Handlung wegen, vnd ob yemant vnserer gesellen, hincz im, oder hincz seinem Gotzhaus dar vmb ansprach gewunnen, die schüll wir im an all sein schäden ausrichten, trewlich an geuer, Vnd dar über ze vrchund geben wir den offenn brief, versigelt mit vnser obgenanten Hertleins von Rotenman vnd Jäkleins des Lauterwekchen aigen anhangund Jnsigeln, dar vnder wir vns verpinden alls daz stät ze haben, daz an dem brief geschriben ist, vnd wan ich obgenant Marquart Tanpekch vnd ich Ekhart Prenner nicht aigner Jnsigel haben, verpinden wir vns, vnder dez obgenanten Hertleins von Rotenman Jnsigel, sta^et ze haben, daz an dem brief verschriben stet, der geben ist ze Salzburg an Sampcztag vor sand Merteinstag nach christi gepürd, drewtzehen hundert Jar, dor nach in dem newn vnd Sybenczikistem Jar.

Source Fulltext: OÖUB 9 (Wien 1906), S. 730-731