Ich Graf Hainreich zw Schawnberch, bechenn vnd tün chünt offenleich mit disem brief, vmb alle Stözz vnd misshel, di zwischen mein, vnd hainreichen von walse von Ens, Jacoben dem Strohner, wernharten dem Aystershaimer, veyten dem Anhanger vnd petern seinem bru^oder, hansen dem Schiuer dem eltern, Leutlein dem A^estpen, hainreichen dem Ofen, helmlein dem Anhanger, auz der hofmarch, Wo^elflein vnd ha^enslein vetern den Sinczendorffern, ha^enslein dem jungern Schiuer, helmlein dem Jörger, ha^enslein dem Jörger, helmhartz Sün, kristan dem Roten, dietreichen dem Ofen, Jacoben dem Chirichperger, Jörgen vnd Alweiglein den Rüdlingern, Ortolfen dem Gaw^eman, Fridreichen vnd Jacoben, brüdern den Schönnawern uon Aterse, Wernharten dem Etzlinger, vlreichen dem Asenhaimer, vlreichen dem Aboldinger, Fridreichen dem Forster, Fridreichen dem Sinczinger, ha^enslein dem Schernhaimer, vlreichen dem Jmperndorffer, Chunraten dem Veltpekchen, Gänglein dem Jmperndorffer, hainreichen dem eltern Aystershaimer vnd Räpplein dem Albrechtzhaimer, des egenanten von walse dienern, vncz auf disen, heutigen tag gewesen sind, daz ich darumb willichleich, für mich, all mein helffer vnd diener angeua^er gegangen bin, hinder den hochgebarn, fürsten, meinen lieben genädigen Hern, Herczog Leutpolten, Herczog zw Osterreich, zw Steyer, zw Kärnden vnd zw Krain, Graf zw Tyrol etc. Also wie er vns, vnd sy, vmb die selben Stözz vnd misshelung, mit minn vnd recht richtet, daz verhaizzen wir stät ze haben, vnd ze volfürn mit güten trewn an allez geuärd, mit vrchund dez briefez, versigelt mit vnserm Anhangundem Jnsigel, der geben ist ze lintz, nach Kristi gebürd dreuczehen hundert jar, vnd in dem nawn vnd Sibenczigisten jar, an sand Gallen tag.

Source Fulltext: OÖUB 9 (Wien 1906), S. 718-719