Ich Ru^odolf vnd ich Fridreich gebru^oder von Waltse, Vergehen fu^or vns vnd fu^or alle vnser Erben, vnd tu^on kunt offenleich mit dem brief, Daz wir mit wolbedachtem mu/at, vnd mit gunst vnd willen des Hochgepornen fu^ersten vnsers genedigen Herren Herczog Albrechts ze O^esterreich, ze Steyr, ze Kernden vnd ze Krain, Graf ze Tyrol etc. recht vnd redlich ze losen geben haben, vnserm lieben Pruder, Hern Reymprehten von Waltse, diezeit Haubtman ob der Ens, vnd seinen Erben allen vnsern tail, den wir gehabt haben an dem Sacz ze Steyr, der vns, vnd Im, mit einander gestanden ist von vnsern Herren den Herczogen mit allen den nu^oczen, ern vnd rechten, so die brief, die von vnsern Herren den Herczogen, vber denselben Sacz gegeben sint, lauttent vnd weisent, die der egenant her Reimpreht, vnser pruder, innhat. Also haben wir Im allen vnsern tail, den wir an dem vorgenanten Sacz gehabt haben, ze lo^esen gegeben, Vmb Vier Tausent phunt, vnd vmb Sechs vnd Sechtzig phunt wienner phenning, der er vns gancz vnd gar, gewert hat, also, daz er sich der veruangen hat fu^or vns ze gelten hincz Kristen vnd hincz Juden, da wir Im hin gezaigt haben, Vnd haben auch wir Im, des vorgenanten Saczes abgetreten, vnd jm den ingeantwu^ortt, an dem heutigen tag, als der brief gegeben ist, fu^orbaz Im vnd seinen Erben mit allen den nuczen, ern, vnd rechten, so vorbenant ist, ze haben, ze niezzen vnd ze nu^oczen, vnd allen i^ern frumen damit ze schaffen an alle vnser, vnd vnserr Erben hindernu^ozz vnd irrung. Vnd des ze vrku^ond geben wir für vns vnd vnser Erben Im vnd seinen Erben, den Brief, versigilten mit vnsern Insigiln vnd mit vnsers lieben Vetern insigil Hern Hainreichs von Waltse, den wir, des gepeten haben, Daz er der Sach gezeug ist mit seinem anhangunden Insigil. Der brief ist geben nach Christi gepu^ort Tausent drewhundert iar, darnach in dem Nevn vnd Sibenczgistem iar an sant Symonis vnd sant Jude tag der zwelifpoten +

Source Fulltext: OÖUB 9 (Wien 1906), S. 726-727