Ich Jörg, ich Wilhalm vnd ich Herwort prueder von Awersperch, vnd alle vnser Erben, veriehen, — daz wier unuerschaidenleich den Edeln Hern Hawgen von Tybein vnd sein Erben versaczt haben zu gescholn vnd gewern, hintz Zertlein dem Juden, Elyas Sun von layb(ach) vnd gen iern Erben, vmb zway hundert markch phennig venedier schilling, da von wier sew nemen vnd ledigen schullen, vmb ffu^omfczikch markch auf sand Michelstag, der nu schierist chumpt, vber ain Jar, vnd furbaz alle Jar vmb ffümfczikch markch an sand Michelstag alz lang vntz daz wier in vnd sein Erben von den gnanten Juden vmb die vorgen(anten) zwayhundert markch venedier schilling, nemen an allen ieren schaden, daz loben wier in pey vnsern trewn, also stet zu haben vnd sew auf die vorgen(ant) teg genczl(ich) da von zu nemen, alz der prief sagt, den die vorgen(ant) Juden von vns inne habent, da vnser aller drey Jnsigel anhangt, vnd dez Hern Hawgen von Tybein vnd vnsers Ohaim Hern Hansen von Stegberch, Mit solhen gelubden, ob wier in vnd sein Erben nicht genczl(ich) dauon losten — wel¬hen schaden sew dez nemen, — den schullen wier in gancz vnd gar ab legen, — mit sampt dem Erkchen, vnd schullen sew daz haben auf vns vnßern Erben vnuerschaidenl(ich), — Wolt wier sew aber nicht genczl(ich) wem Erkchens vnd Schadens, So schullen sew vns phenden an aller vnser hab, — Ob dez alles nicht geschech, So schol sev der landesher oder der Hawpt(man) in Krain gar wern von vns aller vnser hab, — Mit vrchund dez priefs, mit vnser vorgen(ant) Jorgen, Wilhalms vnd herwortz prueder von Awersperch aigen anhangenden Jnsigeln versigelt, der geben ist nach Christes gepurt drewczehen hundert jar dar nach in dem Newn vnd Sibenczkisten Jar, am nachsten Suntag vor aller heyligen tag.

Source Fulltext: OÖUB 9 (Wien 1906), S. 727-728