Ich Chu^enrat der Perwein purger ze Lyntz, vergich für mich, fu^er mein Hausfraun, vnd fu^er all vnser eriben, vnd tuen chund offenbar an dem brief, allen den, die in ansehent oder ho^ernt lesen, Daz ich mit wolbedachtem muet vnd mit gutem willen, recht vnd redleich vnd gar aigenleich mich vnderwunden han, Daz ich meinz gena^edigen, Hochwi^erdigen Herren, Hern Pylgreim Erczbischof ze Salczburg vnd Legat dez Stu^els ze Ro^em fertiger pin warden, daz ich im Ja^erleich sein paw wein vnd trayd fertigen vnd fu^ern schol von Osterreich her auf gein Lyntz, treuleich angeuar, an all sein wagnu^ezz, alz anderr Herren vnd auch fertiger auf der Tuenaw recht ist an allez geua^er, Vnd schol mir mein gena^ediger Herr da von ze lo^en geben, ye von ainem vas wein ez sei fueder oder dreyling, ain pfunt wienner pfenning, vnd von ainem stainer mutt waicz, ain halb pfunt wienner pfenning, vnd schol ich dez selben gelts gericht werden ye mit salcz, nach dem spruch alz daz salcz die weil ganch hat, dacz dem Ha^ellein angeua^er vnd an alle widerred, Ez ist auch geret vnd getaidingt, Daz ich meinem vorgenanten gena^edigen Herren meinz verdienten vnd garntz (!) lo^ens inn schol lazzen Hundert pfunt pfenning zu einem fu^erpfant, Vnd zu einer sicherhait, daz ich im daz volfür vnd volrekch alz ich im gelobt vnd versprochen han, alz daz oben verschriben ist, vnd alz lang, vncz daz ich im ander gu^ete gewizhait tuen oder pu^ergen dar vmb setz, daran in wol genu^egt, vnd waz ich vbrigs verdienn vber die Hundert pfunt, die weil ich nicht ge¬wizhait tuen, dez schol mich mein obgenanter gena^ediger Herr richten, mit saltz alz oben wenant vnd wegriffen ist treuleich an geuär. Daz die voruerschriben sachh also stät vnd vnczeprochen weleib, dar vber zu einem vrkund der warhait gib ich meinem lieben gena^edigen Herren den brief versigelt mit dez erbern Herren Hern Reichers pfarrer ze Rastat, vnd mit dez erbern. ~ beschaiden Chunrat dez Taufchind die zeit Richter ze Salczburg aygen anhangunden insigeln, in vnd i^eren eriben an schaden, Dar vnder ich mich verpint treuleich sta^et ze halten vnd ze volfu^ern waz der brieff lautt, Der geben ist an Mitichen nach dem Palmtag nach Christi gepuerd Dreuczehen Hundert Jar vnd in dem Achczigistem Jar.

Source Fulltext: OÖUB 9 (Wien 1906), S. 825-826