Wir Wenczlaw von gots gnaden Romischer Kunig zu allen zeiten merer des Reichs vnd Kunig zu Beheim, Bekennen vnd tun kunt offenlich mit diesem brief, allen den die yn sehen odir horen lesen, Wann die Hochgebornen Albrecht vnd Leupolt gebruder Herczogen zu Osterich, ze Steyer, ze Kernden vnd zu Krayn, Grauen ze Tirol zc. vnsir lieben Sweger, Oheim vnd fursten i^ere Land vnd furstentum, die von vns vnd dem Heiligen Reich ze lehen rurent, williclichen mit eynander getaylet haben, haben wi^er vnsern guten willen vnd gunst dor czu gegeben, Vnd haben dem vorgenanten Herczog Leupolt vnd seinen Erben bestetigt vnd bestetigen ouch wissentlich mit diesem brief alle die Lande, furstentum, vnd Herscheft, die yn an der vorgenanten taylung worden sind, Also, das sie die inn haben besiczen vnd niessen sullen, in aller weys, als die taylbrief sagen, die czwischen den egenanten Herczogen dorubir geben sind. Doch das vns vnd vnsern Erben vnschedlich sey, an der gemechtnuss vnd verbuntnuss, die czwissen seliger gedechtnuss vnserm lieben Herren vnd Vater Herren Karl Romischen Keyser vnd vns an eynem tayl, vnd czwissen den obgenanten Herczogen an dem andern teyl, vormals beschehen vnd gemacht sind, vnd das ouch vns vnd dem Heiligen Reich behalten sein alle recht, die wir doran haben an als geuerd vnd argelist. Mit vrkunt dicz briefs versigelt mit vnsir kuniglicher Maiestät Jnsigel. Geben zum Piesk noch Crists geburt Dreyczen hundert Jar, dornach in dem Achczigsten Jar an Suntag Reminiscere, vnserr Reich des Behmischen in dem XVIJ. vnd des Romischen in dem vierden Jarn.

Source Fulltext: OÖUB 9 (Wien 1906), S. 801