JCH Chu^enrat ze den zeiten pharrer der pharrchirchen ze Lawsse Vergich für mich vnd für mein nachkomen pharrer vnd verbeser daselbs —, Daz ich — mit willen vnd günst vnd nach Rat meins Lehenherren des hochwi^erdigen Geistleichen Herren Hern Seifrids des Hagenauer Abpt ze Melkch der vorgenanten meiner Chirchen Rechter Lehenherr, Recht vnd redleichen gegeben han, Dem erbern manne Nichlasen dem pollen pürger ze Wienne, vnd seinen erben ze einem rechten pu^erkchrecht, Acht vnd zwainczig Jewchart Akchers Gelegen an dem Wiennerperg in dem Chu^eperg, an zwain Luzzen vnd stozzet mit ainem tail an die A^ekcher, die der Egenant Nichlas der Poll von den Geistleichen vrown vön Merenberkch gechoüfft hat, vnd stozzent mit dem andern tail an den Akcha^er, den derselb Nichlas auch da hat, vnd sind weilnt weingerten gewesen, die o^ed sind warden, vnd manig iar o^ed sint gelegen, daz sich i^er niemant vnderwinden wölt, vnd daz der vorgenanten pharrchirchen, chain di^enst noch nu^etz douon geuallen ist Also, daz der vorgenant Nichlas der Po^ell vnd sein erben, sullen furbaz die Egenanten Acht vnd zwainczig Jewchart Akchers von dem Egenanten hern Chu^enraten vnd seinen nachkomen pharrern ze Laüsse in pu^erkchrechts weise haben, niezzen vnd nützen, — vnd sullen auch si vnd wer dieselben Äkcher nach in ynnehat vnd besitzet, douon dienen. dem obgenanten hern Chu^enraten vnd seinen nachkomen, von i^egleicher Jewchart alle iar an sand Michels tag drey wienner phenning ze purkchrecht, in den rechten, als man ander vberlentisch pu^erkchrecht in dem Lannde ze Österreich dient, vnd nicht mer. Wa^er aber, daz die vorgenanten Ekcher wider ze weingarten wu^erden, als si emaln gewesen sint, So sol man allen den di^enst douon raichen vnd geben, den man emaln douon gedi^ent hat, die weil si weingerten gewesen sint. —. Vnd des ze Vrchünd gib ich in den brief versigilten mit meinem Jnsigil vnd mit des Egenanten meins Lehenherren Jnsigil des hochwirdigen geistleichen herren hern Seifrids dez Hagenawer, der sein Jnsigil ze einer warn bestetigung der vorgeschriben sach an den brief gehangen hat, Der geben ist ze Wienn nach Christs gepu^erd Drewtzehen Hundert iar, darnach in dem Achtzigistem iare an sand Peters abennde, als er auf den Stuel gesaczt warde.

Source Fulltext: OÖUB 9 (Wien 1906), S. 802-803