JCH Vlreich von Pergaw zu den zeiten Hofrichter in O^esterreich Vergich, — daz ich — an der erbern geistleichen frown stat der abtessinn vnd des gantzen Conuents ze Maernberch, der recht Erbuogt ich vnd mein Erben sein — gegeben han, Dem erbern mann Niclasen dem Po^ellen, purger ze Wienn, vnd seinen Erben, ze einem rechten Purchrecht, zwainczig Jewchart Akchers gelegen an dem Wiennerperg in dem Chueperg pey einander, an ainem luzz, vnd sint vormals Weingarten gewesen, di O^ed sint worden, vnd manig iar o^ed sint gelegen, daz sich i^er, nyemant v^enderwinden wolt vnd daz den vorgenanten frown, chain dienst noch nutz dauon geuallen ist, vnd Sto^ezzent an der vorgenanten frown Ekcher, die man gen Jntzestorf pawt, vnd an die Ekcher, die zu der Chirichen gen Lauchsee geho^erent, Also, daz der vorgenant Niclas der Po^ell vnd sein Erben sullen fu^erbaz die vorgenanten zwaintzig Jewchart Akchers von den egenanten Geistleichen frown vnd von i^erm Chloster, in Pu^erchrechts weise, haben, niezzen vnd nu^otzen — vnd sullen auch Si vnd wer dieselben A^ekcher, nach jn innhat, dauon dienen denselben frown vnd iren nachko^emen, von igleicher Jewchart alle iar an sand Michels tag, drey wienner phenning ze pu^erchrecht in dem rechten, als man ander v^eberlentisch Purchrecht in dem Lande ze O^esterreich dient, vnd nicht mer. — vnd dez ze v^erkund gib ich Jn den brief versigilten mit meinem Jnsigil, vnd mit meins diener Jnsigil, Merten von Harssendorf, der der Sach gezewgen ist, mit seinem Jnsigil, im an schaden, Der brief ist geben ze Wienn nach Christes gepu^erd, Drewtzehenhundert iar, darnach in dem Achtzgistem iar, des Phintztags nach dem Heyligen Prehem tag.

Source Fulltext: OÖUB 9 (Wien 1906), S. 777-778