Ich Wolfgang von Waltsse vnd ich Vlreich sein Veter, wir vergehen — vmb die schütt die gelegen ist bey dem Schwaikch Hof, der Gelegen ist zü Cholastorff, die vnser rechten aigens ist, daz wir — dieselben Schütt, darauf Holcz und graz wechst, verlihen haben — zu einem rechten Purkchrecht vnserm Amptmann Jacoben in dem Alten werd, frown Chunigunden seiner howsurawn vnd ir baider erben, Mit der beschaidenheit, daz si vnd ir erben oder wer den Hof zu Cholastorff noch (!) in innehabent vnd besitzet von der vorgenant Schütt mit allen den nüczen, die darauf bekomen mit Holcz, mit graz oder mit Gruemat vns dauon dienen sullen alle iar zu weihnachten zu ausgeunden veirtagen zwelif schillinng wienner phenning, zu Purkchrecht vnd sol auch fürbas die vorgenant schütt mit den nüczn, Holcz, graz vnd gruemat, die darauf jerleich bekoment als die Schütt ieczund gelegen ist, ir werd von wazzergusse mynnder oder mer, wer aber daz ez den Swaigern ire Lannt hin prech vnd chem zu der Schütt, die wir gelihen haben vnserm Amptmann, wo daz die Swaiger megen geczaigen mit gu^ot Chu^ontschafft, daz sol in der Amptmann vnd sein erben oder sein nachkomen die die schütt noch (!) in innehabent ligen lazzen, zu dem vorgenanten Hof zu Cholastorff sol die schütt gehören vnd dauon nicht verchaufft werden — vnd sein auch wir ich obgenanter Wolfgang von Waltsse vnd ich Vlreich sein veter der obgenant Schütt vnd aller der nücz, die darauf ierleich bekomen, — ir Recht gewern vnd scherm für alle ansprach vnd was in daran abget, dauon sullen wir sie an scheden Pringen, vnd dez ze vrchund geben wir In zu einer warn vrchund den brief besigilten mit mein obgenant Wolfgangs von Waltsse insigil vnd mit des erbern manns Jnsigel Jörgen des Prayttenaicher vnd wann ich vorgenant Vlreich von Waltsse ietzund nicht aygens Jnsigils enhab, darumb so verpind ich mich vnder die obgenant Jnsigil allez daz stet ze haben vnd zu laisten, daz vor an dem brief geschriben stet, der geben ist zu wienn nach Christs gepürt Drewtzehen hundert darnach in dem Achczigisten Jar des nesten Phincztags nach dem Prehem tag.

Source Fulltext: OÖUB 9 (Wien 1906), S. 778-779