Wir Albrecht zc. Bekennen —, daz vns vnser lieber getrewr Wulfing von Stubenberg durch sunder trew gelihen hat zu vnserer rechten notdurft fünfthalbtausent phunt wienner phenning vnd dafür sullen wir vnd geloben auch für vns vnd vnser erben, im oder seinen erben, zwischen hinn vnd dem schierst künftigen sand Gilgentag in phandes weis an abslag der nutz in ze antwurten vnsere Vesten Starchenberg vnd Gu^otenstain mit allen den Leuten vnd gu^otern, Zinsen, zehenden, gu^olten, nüczen, wi^erden vnd eren die darzu^o gehörent, wo die gelegen vnd wie Si genant sein, Vnd was derselben gült vnd nucze nu auf den nesten kunftigen sant Stephanstag ze ingeendem Augst vnd darnach hin geuallen sullen, die sullen wir ieczund für sich schaffen, nider ze legen, daz si dem egenanten Wulfing vnd seinen erben dannenthin wartend sein vnd geuallen, Also daz in ierlich fünfthalb hundert phunt phenning nu^otz geuallen vnd darzü ein purkhu^et zu beden Vesten, nach rat vnsers lieben getrewen Haydenreich von Meyssaw vnsers Lantmarschalls in Österreich. Wer aber daz dieselbe gült vnd nucze nicht ge¬langen mo^echten ierlich auf fünfthalbhundert phunt gelts vnd die Purghu^ot, Was denne daran abget, das sullen wir in anderswo erstatten, daz es fünfthalbhundert phunt gu^olt vnd nutz vnd darzu^o die Purghu^ot genczlich bringe, alle nucz ze rechen nach dez Landes recht ze O^esterreich mit rechter raittung vngeuerlich, Also daz in an den obgenanten fünfthalbtausent phunden phenning von ye zehen phunden ain phunt gelts ierlich geualle an abslag der nucze vnd denselben Sacz sullen wir dem egenanten Wu^olfingen oder seinen erben also ausrichten vnd mit vnserm Jnsigl verbriefen mit solichen punden vnd gedingen, als wir vesten vnd Herscheften gewonlich verseczen in vnserm Land ze O^esterreich vnd in der mazze daz Si damit versorget vnd bewart sein, an allez geuer. Vnd daz wir in das also auzrichten vnd die obgenanten vnser vesten mit aller zu^ogehör inner der vorgeschriben zeit dafür inantwu^orten, Darüber setzen wir in zu sampt vns zu Pu^orgeln vnser lieben getrewen, Haydenreich von Meyssaw obgenant, Hainrich von Walsse, Reynprecht von Walsse vnsern Haubtman ob der Ens, Hainrich von Neytperg, Jörgen von Liechtenstain vnsern kammermaister, Eberhard von Kappell vnd Wernharten den Dru^ogsetzen, Mit der beschaiden, wer, das wir oder vnser erben, dem egenanten Wu^olfing oder seinen erben die egenanten vnser Vesten Starchenberg vnd Gu^otenstein mit sampt allen iren zu^ogehören inner des obgenanten sand Gilgen tages nicht in antwu^orten mitsampt vnsern Saczbriefen als oben geschriben stet, Wenn denn derselbe Wu^olfing oder seine erben, vns, vnd die vorgenanten vnsern Pu^orgeln darüber manent, So sullen wir oder vnser erben, vnd auch derselben vnsrer Pu^orgeln yeglicher in, mit zwain erbern mit vier pherden laisten gen Wienn in ein offens Gasthavs da man vns hinczaiget, vnd da nicht auzkomen vntz wir, in, die egenanten Vesten ingeantwu^orten, vnd den Satz auzgerichten als oben verschriben stet an allez geuer. Wer aber daz in laistung verczogen wurde oder daz in nicht wu^orde geleistet, was Si denn des geltes fürbaz schaden nemen, den sullen wir in genczlich ablegen vnd widerkeren vnd das sullent Si dacz vns vnd denselben vnsern Pu^orgeln vnd aller vnser Hab haben. Darüber zu vrkund geben wir für vns vnd vnser erben dem egenanten Wu^olfing vnd seinen erben disen brief besigelten mit vnserm aufgedrukten petschad, wan wir vnser Jnsigl yeczund bei vns nicht haben, Vnd wir die obgenant Purgeln alle als wir da oben benennet sein, Bekennen auch mit disem brief allez das so da oben von vns geschriben stet, vnd des zu mererer getzeugnuzz vnd sicherhait haben wir vnsere Jnsigl zu vnsers Herren des Herczogen petschat auch gedrukt an disen brief, Der geben ist ze Wels an dem nechsten phincztag nach sand Jacobstag. Anno dni zc. LXXXo.

Source Fulltext: OÖUB 9 (Wien 1906), S. 873-875