Ich Seywolt von Volkenstorf vergich offenleich mit dem brief vnd tuen chund allen den di in sehent oder horent lesen, daz ich mit wolbedachtem muet vnd nach rat zü der zeit, da ich ez mit recht wol getuen mocht, vber ain worden bin vnd recht vnd redleich geschaft han, ob daz wer, daz ich abgieng mit dem tod an gescheft da got lang vor sei, So sol mein liebe wirtinn Ann Hern Hansen dez Merswancker tochter, dem got genad, alle vnsere Chinder di wir mit einander haben oder noch chünftichleich mit einander gewinnen vor allen vreuntten vnd vor aller manichleich mit aller irr hab, di ich indert hab oder laz, ez sei inner lancz oder auzzer lancz, ez sei manschaft, erib, aygen, Lehen, zehent oder wie di Hab genant ist, oder wo sie gelegen ist versuecht vnd vnuersuecht an allen chrieg vnd widerred inn sol haben vnd ziechen sol in trewer weiz alz ein mueter iren chindem schuldig vnd gepunden ist, vnd sol auch die inn haben mit allen nuczen ern vnd rechten vnd mit aller meiner Hab alz oben geschriben stet, di ich indert hab, oder laz vnuerchumert vnd auch für schiezzen ze nücz vnd anlegen nach der nachsten vreunt rat vncz alz lang daz die chinder, die wir miteinander haben oder gewinnen, gewachsen vnd di Hab vodern vnd ir Hab wol ze verantwurtten und inn gehaben mugen vnd wellen, vnd so sol in dann mein vorgenante liebe wirtinn all ir Hab wie die genant ist versuecht vnd vnuersuecht slechtleich vnd trewleich an geuer in antwurten vnd sol si dann der vollen gewalt lazzen haben an alle widerred vnd chrieg vnd allen irn frum damit schaffen lazzen vnd sol si daz mit nichte wider sprechen. Wer auch, daz mein vorgenante wirtinn einen man nem vnd di chinder nicht inn gehaben möcht oder wolt oder daz sie di chinder in der mazz vnd alz getrewleich nicht inn hielt, daz wol gewizzenleich vnd ein chundschaft da wer oder daz mein vorgenant wirtinn auch mit dem tod abgieng, da got lang vor sey, wie sich der sach aine füeget oder geb, So sol sich mein lieber prueder her Herdneyd von Winckel der chinder vnd auch aller Hab wie die genant ist freileich vnderwinden an alle wider (sic) vnd so dann di mit aller hab auch vnuerchumert vnd den chindern für schiezzen ze nucz vnd an legen nach der vreunt rat vnd inn haben in trewes hant vor allen vreuntten vnd auch vor aller manichleich, daz sol auch in chainen weiz weder mit recht noch an recht nyemant wider sprechen vnd sol auch di chinder vnd di hab auch inn haben vntz alz lang, daz di chinder gewachsen vnd di hab vodern vnd dann selber wol verantwurtten mugen vnd wellen vnd da sol er si auch dann in chainen weiz irren noch engen an. Mit vrchund dez briefs den ich dar vber versigel mit mein vorgenant Sywolt von Volkenstorf anhangunden Jnsigel vnd zu^o einer pezzern sicherhait vnd zeugnuzz hab ich gepeten meinen lieben Ohaim Hern Vlreich den Velber vnd mein sunder lieb vreunt Hern Eberharten von Cajpellen die zeit Hauptman ze Ens, Vnd Hern Weickharden den Winckler daz di ire Jnsigel durch meiner vleizzigen pet willen an den brief gehangen habent in vnd irn erben an schaden, der geben ist nach christi gepurt drewczehen Hundert Jar vnd dar nach in dem Achczikisten Jar dez Eritags vor sand Veicztag dez Heiligen Herren.

Source Fulltext: OÖUB 9 (Wien 1906), S. 864-866