Ich Fridreich Erwoltspekch, vnd ich Christan Nuzzdorffer, wir veriehen offenlich mit dem brief, daz wir versprochen haben vnd versprechen auch vnsern genaedigen Herren Hern Pilgreim, Erczbischofen ze Salzburg, Legaten des Stüls ze Rom, vnd seinem Gotzhaus ze dienst fu^eren vnd halten, vnser igleicher¹⁾ mit ainem Spiezz, mit vnser selbs Leib, mit Harnasch vnd Rossen wol gezewget, als dar zu^e gehöret, vnd nütz sei, getrewlich an geuer, in dem gegenwürttigen Chrieg, den Hertzog Albrecht von O^esterreich mit Graf Hainreichen von Schawnberg hat, wo vns vnser vorgenanter Herr von Salzburg hin mainet, dem obgenanten Herczog Albrecht von Österreich ze hilf vnd ze dienst ze nützen, Vnd dar vmb hat vns vnser vorgenanter Herr von Salzburg, gannczes Soldes von Hewtigen tag²⁾ hinfür, auf ain gantzes Monat an allen schaden, förderlich ausgericht vnd bezalet, waer auch daz wir di weil der dienst wert, icht redleicher schaeden naemen, auf dem Veld, in vnsers egenanten Herren dienst mit der Haubtlewt wizzen vnd weisung, die vnser vorgenanter Herr von Salzburg, oder sein geschaeft dar zü seczt, Ez sei an Rossen, an Hengsten, oder an Vankchnüzz, diselben schaeden sol vns vnser vorgenanter Herr von Salzburch oder sein Gotzhaus wider chern, nach seines Rates Rat, also, waz der selb Rat dar vmb sprichet des genügt vns wol vnd sol dabei beleiben, Wir süllen auch diselben schäden³⁾ ze hant oder inner ainem monad, nach dew vnd der vorgenante Sold auzzget, mit redleicher weisung vordern vnd melden an vnsern vorgenanten Herren von Salzburch oder seinen nachchomen, vnd an wew wir des nicht taeten, des waer man vns nach dem vorgenanten Monad nicht gepunden, Vnd dar v^eber ze vrchund geben wir disen brief versigelten⁴⁾ mit des Erbern manns Chunrats des Taufchind Richter ze Salzburg, anhangundem Jnsigel, der sein Jnsigel durch vleizziger bet willen an dem brief gehangen hat, im vnd seinen Erben an schaden, wan wir die zeit nicht Jnsigels hetten, dar⁵⁾ vnder wir vns verpinden stoet ze haben allez daz an dem brief geschriben ist, Der geben ist ze Salzburch an Eritag vor sand Veytstag, nach Christs gepurd Dreu czehen Hundert Jar darnach in dem Achczigistem Jare. +||
||
a) Ich Christan Hell, ich Hanns Geestel, ich Reichet Weytas vnd ich Sweykel der Sweybraer etc.||
||
b) Jch Christan, ich Nikel die Tewsenperger, ich Tomel Chrayburger, ich Haennsel Pandorfer, ich Ott Chraeblinger, ich Alhart Chalischperger, ich Ül Aschaher, Jch Ekkel Gaerr, ich Fridrich Fewersinger, ich Toman Tollinger vnd ich Völchel Strazzer etc.

Source Fulltext: OÖUB 9 (Wien 1906), S. 862-863