Wir Albrecht von Gotes gnaden herczog ze Oesterreich, ze Steyr, ze Kernden vnd ze Krain Graf ze Tyrol zc. embieten den erbern weisen vnsern sunderlieben ~ dem purgermaister ~. dem rat vnd den purgern ze Pazzaw vnsern gruz vnd allez gut. Wir haben wol in genomen ewr maynung alz vns ewr mitburger nu vnderweiset habent, Vnd alz vnser lieber freunt her Albrecht bischof ze Pazzaw sich fur der geslozzen ains die des von Schawnberg satz von im sind, legen wil, gunnen wir euch wol vnd bitten euch auch fleissig, daz ir im darzu geholffen seit so ir ymmer pest muget. Ob auch der von Schawnberg yndert zu richtung vnter vns cheme, so wellen wir gern fur euch gedenken alz auch fur ander die vnrechtlich von im beschedigt sind, wan vns sunderlich ewr kumber von im getrewlich laid ist. Geben ze velde vor Pewrbach an sand Johans tag ze sunnewenden anno LXXX.||
domini ducis consilium.

Source Fulltext: OÖUB 9 (Wien 1906), S. 868