Ich Ott am Chollenfu^oert vnd elspet mein Hausfraw, vnd Katrey mein Tochter, vnd Symon der Sneider, ir wirt, vergehn mit dem prief daz wir vns liebleich vnd veraintlich bericht haben, wir vnd all vnser erben . . mit Otten dem Lintinger vnd mit im all seinen eriben, vmb alle die Hab, di Peters lazzen hat, meins egenantten Otten swester, mit solicher beschaidenn, daz wir fürbazz hintz im, noch all sein eriben nichts mer ze sprechen sullen haben, Vmb die egenantten Hab, weder mit recht, noch an recht, wer aber daz dem egenantten Otten dem Lintinger oder seinen erben yemant zü sprech von eribschaft wegen, so sull wir sein vnd seiner Erben fu^oerstand sein, vnd gwer, wo in des not, vnd du^orft geschiecht, mit recht, wer aber, daz in doran icht abgien, vnd nicht fu^oerstand wern: swaz er des schaden nem, vnd wie der schad genant wer, denn der egenant Ott, oder seiner erben, einer gesprechen mag pei seinen trewn vngeswörn, den soll wir in gancz vnd gar ablegen, vnd widerchern, vnd sullen si daz haben . . auf all vnser Hab, wo wier di haben . . oder wo di gelegen ist, vnd daruon bechomen mit vnserm güetlichen willen, an all vnser irrung vnd wider red, das in daz stet vnd vnuerchert beleib, dar vber geben wir in den prief ich egenanter Ott am Chollenfu^oert vnd elspet mein Hausfraw, vnd katrey mein Tochter vnd Symon der Sneider ir wi^ert, versigelt mit der erbern Haünoltz des Reittier vnd Perchtoltz am aigen, die zeit des goczhaus Richter ze Garsten anhängünden insigel, Daründer wir vns verpinten alles daz stet ze haben, als vor an dem prief geschriben stet, wann si iere insigel dürch vnser vleizzigen pet willen an den prief gehangen habent, in vnd i^err paider, erben an schaden. Geben nach Christes gepürtt drewtzehen Hvndert. iar, darnach in dem achczigistem iar, des Phincztags vor Phingsten.

Source Fulltext: OÖUB 9 (Wien 1906), S. 847