Wir Albrecht von gotes gnaden Herczog ze O^esterreich, ze Steyr, ze Kernden, vnd ze Krain, graf ze Tyrol zc. Bechennen vnd tu^on chunt Offenlich mit disem brief, daz wir vns gen dem Hochgebornen fursten vnserm lieben Öhem Herczoge Friderichen Phallenczgrafen bei Reyn vnd Herczogen in Beyern zc. verpunden haben vnd verpinden vns auch wissentlich, Swaz wir grafe Hainreichen von Schawnberg in dem krieg, den wir yeczunt mit Jm haben, seyner Vesten oder geslözzen, Merkte oder dörffer angewinnen, vnd in vnser gewalt bringen, daz wir damite gen dem selben vnserm Öheim vnd auch gen seinen Brudern den hochgebornen fürsten Stephann vnd Johannsen auch Phallencz grafen bey Reyn vnd Herczogen in Beyern vnsern lieben Oheimen, sten vnd beleiben sullen in solicher Buntnüsse vnd freuntschaft alz wir baident halben vns gen einander verschriben haben mit vnsern Landen ze Österreich vnd ob der Ens, vnd irem Lande ze Nydern Beyern, nach Laute der brief, die wir dar uber eynander gegeben haben. Mit vrchund dicz briefs geben ze Starhemberg an dem Hausrugg an Freitag vor sante Pangracien tag. Nach kristes geburt Dreu czehen hundert Jaren, dar nach in dem Achczigisten Jare.

Source Fulltext: OÖUB 9 (Wien 1906), S. 848