Wir der gancz Rat der Stat ze Enns dy dye zeit des Rats gewesen sind veriehen offenleich mit dem prief vnd tu^en chunt allen den dy in sehent hörent oder lesent, Das wir nach rat gunst vnd guetem willen der eltern vnd der pesten purger aus der gemain ze Enns. Recht vnd redleich verlichen haben zu ainem rechten Chawfrecht als chaufrechts recht ist in dem Land ob der Enns, Hansen dem Mülner an der alten Prukk vnd seiner Haussurawen vrawn Gueten vnd allen i^eren Erben, Sünen vnd Töchtern von Erben ze Erben, Dye Mu^el gelegen ze Enns an der alten prukk, dy da gehört zu vnserm Spital ze Enns, Vnd haben in dy verlichen mit allen eren nützen vnd rechten, dy dar zu^e geho^erent, wie dy genant sind versu^echt vnd vnuersücht, Jn sölicher beschaiden, das sew oder wer dy obgenanten Mu^el nach in Jnne hat vnserm obgenanten Spital ze Enns do von raichen vnd dyenen schu^ellen ze rechtem dinst alle Jar Järleich an sand Michel tag zwen vnd dreizzk meczen du^eerres chorn, Vnd darzu^e alles das Malter des das obgenant Spital bedorff, das schol man ym an der selben Mu^el ga^entzleich aus richten vnd malen an alle Mawtt vnd an alle vadrung vnd nicht mer an alles geua^er, Sew vnd all ir erben mu^egen auch mit dem obgenanten i^erem chawfrecht vnd mit i^eren rechten an der obgenanten Mu^el, allen i^eren frumen wol schaffen, versetzen, verchawffen, machen vnd geben, wem sy wellent vnuerczigen des Spitals rechten vnd vadrung. Es schol auch alle Handlung all zeit geschechen mit der purger willen vnd wizzen ze Enns vnd nach irem rat vnd mit vnsers spitalmaisters Hant, Vnd wem dy obgenant Mu^el fu^erbas mit der purger willen vnd wizzen gemacht oder geben wi^ert der scholl all zeit mit sein selbe leib dar auf sitzen vnd dye Jnne haben Jn allen den rechten als oben an dem prief geschriben ist an alles geua^er. Vnd schol auch dy Mu^el fu^erbas an der purger willen vnd wizzen nyndert verchumert werden. Wi^er der gantz Rat, wer dy zeit Rat ist ze Enns schu^ellen vnd wellen auch des obgenanten chaufrechts auf der obgenanten Mu^el Jr recht Herren vnd scherm sein als chaufrechts recht ist in dem Land ob der Enns an alles geua^er. Vnd wann ein wandlung da geschi^echt, wer denn ab vert, der schol geben vnserm Spital ze Enns dreizzk phennig ze abuart, Vnd wer auf vert auch als vil vnd nicht mer. Wa^er aber das dy Handlung von in mit ichte vbergriffen wu^eerd vnd nicht also gehandelt vnd volpracht wu^eerd als oben an dem prief geschriben stet, wie sich daz fu^eeget, So schu^ellen sy von allen i^eren rechten sein, dy sy haben scholten an der obgenanten Mu^el an alle i^er wider red. Vnd des alles zu ainem waren vnd sta^eten v^erchunt geben wi^er in den prief, Besigelten vnd wol besta^ett mit vnserer Stat ze Enns grozzen anhangunden Jnsigel, Der geben ist ze Enns nach Christi gepu^eerd Drewczehen Hundert Jar vnd in dem Achczkisten Jar in den Phingst veyrtagen.

Source Fulltext: OÖUB 9 (Wien 1906), S. 850-851