Ich Johannes Greimleins in der Aw su^en ze Swannss meins Herren Hern Hainrich von Walsse von Ens schreyber der lenger, vergich mit dem brief offenbar allen Lewten lebentigen ycze vnd hernach chünftigen, den der gegen würtig brief geczaygt wirt vnd für chumpt, das ich meinem yczbenanten Herren von dez geschefts wegen, so ich von im inne gehabt vnd gehandelt hab, Geltes schuldig warden bin mit redleicher rechter Raittung vnd in dez nicht hab ze richten gehabt, hab ich in mit vleizziger pet Erber lewt erpeten, daz er mir die genad tan vnd gevrlawbt hat, daz ich dyennen solle, wa ich mag vnd wa mir daz chumpt, doch also beschayden vnd mit warten sunderleichen auz genomen, Wann mich derselb oft genant mein Herre von Walsee vodert, wa ich denne bin, sa soll ich mit meinem leib vnd gu^ot zu im chomen an alle wider red vnd an alles vercziehen vnd an seinen willen von im nicht nacher chömen, ich gewinne sein Huld e des vnd ob ich yemant emals gelub getan hiet, oder noch fürbazer taet, di sullen mich dez nicht wenden, nach irren nach dhainerlay dinst nach Herschaft, die sullen dhain recht hintz mir haben, damit ich des geirret möcht werden. Taet aber ich des nicht, wenn er oder wer den brif mit seinem gu^etleichen willen inne hat vnd in denn fürbringet, dem pin ich leibs vnd güts veruallen an alle genade vnd mag damit tu^en waz er wil, Vnd das ich alles das, sa an dem brief geschriben stet, Staet haben vnd also volfueren wil, trewleichen an alles geuerde, des hab ich ze Got vnd allen seinen Heyligen geswaren ainen gestalten ayde dapey/o ze beleiben vnverchert vnd an alle wider red, Vnd dez ze scheinberen ürchünde, dez gib ich den offen brief besigelten mit meinem anhangundem Jnsigel, dez sind auch geczewgen durich su^onder meiner vleizzigen pet willen mit iren anhangunden Jnsigeln Her Stephan zden zeiten Pharrer ze Sündelburch vnd Wetzet der Schikch die czeit Vogt auf dem Stremberg, Jn vnd allen iren Eriben an alle schaeden, Geben ze Sumeräw an Mittichen in den Phingst veyertagen, Nach Christi gebu^orde Drewczehen Hundert iar dar nach in dem achczkistem Jare.

Source Fulltext: OÖUB 9 (Wien 1906), S. 853-854